Tesla, SpaceX, Twitter kimi texnologiya nəhənglərinin sahibi olan Elon Musk WhatsApp tətbiqinin etibarlı olmadığını iddia edir. Belə ki, milyarder öz Twitter hesabında WhatsApp etibarlı deyil başlığı ilə paylaşım edib. Qeyd edək ki, ötən gün Twitter şirkətinin mühəndisi olan Foad Dabiri öz hesabında paylaşım edib. Dabiri öz hesabında “WhatsApp mən yatarkən və səhər 6 da mən oyandığımda arxa planda mikrofondan istifadə edir. Burada nə baş verir?” deyə paylaşım edib. Məhz bundan sonra Elon 139 milyon izləyicisi olan şəxsi hesabında bu barədə paylaşım edib. Həqiqətən də WhatsApp bizi gizlicə dinləyirmi?
Elon Musk paylaşım etdikdən qısa müddət sonra WhatsApp şirkəti yaranan məsələyə aydınlıq gətirib. Şirkət bildirir ki, onlar Foad Dabiri ilə vəziyyəti araşdırıblar. Əsas problem mühəndisin istifadə etdiyi Pixel smartfonunda qeydə alınıb. Belə ki, Android smartfonlardakı Gizlilik müqaviləsində olan səhv ucbatından bu hadisə baş verib. WhatsApp bildirib ki, tətbiq sadəcə istifadəçilər zəng etdikdə, səsli mesaj göndərdikdə mikrofondan istifadə edə bilər. Şirkət artıq Google şirkətinə müraciət edərək bu problemin aradan qaldırılmasını xahiş edib.
Elon Musk tərəfindən paylaşılan görüntüyə əsasən WhatsApp bildirib ki, bütün səsli mesajlar və zənglər ucdan-uca şifrələnir. Yəni istifadəçilərin mesajlar, zəngləri heç şirkət tərəfindən belə müəyyənləşdirilə bilməz. Ümumiyyətlə WhatsApp tətbiqi hər zaman istifadəçilərin gizliliyini qorumaq üçün yeniləmələr edir. Lakin yenə də istifadəçilərin tam güvənini qazana bilməyib.
