Texnologiya sahəsinin nəhənglərindən biri olan Qualcomm şirkəti rəqibi MediaTek şirkətinin avtomobil sahəsinə atdığı addımdan sonra mövqeyini daha da gücləndirərək Autotalks şirkətini alıb. Qeyd edək ki, ötən günlərdə MediaTek bütün diqqətini avtomobil və süni intellekt sahəsinə yönəldəcəyini bildirmişdi. MediaTek şirkətinin ən böyük rəqibi olan Qualcomm isə avtomobil sahəsindəki mövqeyini gücləndirməyə çalışır. Texnologiya nəhənginin təxminən 400 milyon dollara əldə etdiyi Autotalks şirkəti yol qəzalarının qarşısını almağa yönəlmiş texnologiyalarda istifadə olunan çiplər istehsal edirdi. Belə ki, Autotalks çipsetləri nəqliyyat vasitələrinə və sürücülərə qarşıdan gələn nəqliyyat vasitələrini aşkar edərək bildirir. Bununla da kor nöqtədə qalan nəqliyyat vasitələri belə sürücü tərəfindən müəyyənləşdirilir və potensial yol qəzasının qarşısı alınır.
Avtomobil sahəsində texnologiya və funksiyalar inkişaf etdikcə avtomobil istehsalçılarının çipset tələbi də artır. Bununla da avtomobil sahəsi çipset istehsalçıları üçün gələcək vəd edir. Məhz MediaTek, Qualcomm kimi iri şirkətlər bunu daha əvvəl müəyyən etdiyi üçün avtomobil sahəsi üçün can atırlar. Qualcomm şirkəti Autotalks şirkətini almaqla bu sahədə olan mövqeyini gücləndirməklə yetinməyib, gəlirlərini də artıracaq. Çünki, Autotalks şirkəti yol təhlükəsizliyini yaxşılaşdırmaq məqsədi ilə insanlı və insansız nəqliyyat vasitələri üçün Vehicle-to-everything yəni V2X rabitə texnologiyalarında istifadə olunan ixtisaslaşdırılmış mikrosxemlərin istehsalı ilə məşğuldur. Bir sözlə desək, Autotalks şirkəti avtomobil sahəsində ixtisaslaşmış və təcrübəli şirkətdir.
Qualcomm şirkətinin avtomobil mühəndisliyi üzrə vitse-prezidenti Nakul Duggal Autotalks şirkəti ilə bağlı açıqlama verib. O bildirib ki, 2017-ci ildən bəri Qualcomm şirkəti V2X texnologiyalarını araşdıraraq ona sərmayə qoyur, avtomobil sahəsində bu texnologiyalar çox mühümdür. Beləliklə Qualcomm avtomobil sahəsində V2X texnologiyalarının ən başlıca istehsalçısı olacaq.
