Tam adı Advanced RISC Machines olan ARM şirkəti də artıq öz gücünü göstərmək istəyir. Belə ki, bir çox şirkət ilə ortaqlıq edən ARM artıq özünəməxsus prosessor hazırlamaq fikrindədir. Qeyd edək ki, Mediatek və Qualcomm şirkəti daxil olmaqla bir çox çipset istehsalçısı cortex nüvələrindən yararlanır ki, nüvələr məhz ARM şirkətinə məxsusdur. İndi isə şirkət strategiyasını dəyişərək hərkəsə öz texnologiyasının gücünü göstərmək istəyir. Bununla da şirkət ARM arxitekturasını beynəlxalq sərgilərdə və tədbirlərdə nümayiş etdirə biləcək.
Bildiyimiz kimi, hal-hazırda bazarda mövcud olan ARM əsaslı M seriyalı Apple prosessorları bazarda olan rəqiblərinə meydan oxuyur. ARM şirkətinin hazırlayacağı prosessor bazardakı bütün prosessorlar ilə rəqabət aparmalıdır. Məhz bu səbəbdən də şirkət istehsalçı firmalar ilə birgə araşdırmalar apararaq hazırlıqlara başlayıb. Hətta bu məqsəd ilə komanda belə hazırlayıb. Lakin bütün bunlara baxmayaraq ARM şirkəti bazarda mövcud olan məhsulları ilə ilkin mərhələdə rəqabətə girmək istəmir. Belə ki, şirkət kompüter, noutbuk, smartfon kimi cihazlara uyğun olan özünəməxsus mobil prosessor üçün zəmin hazırlayır.
Qeyd edək ki, bir çox şirkət bəzi zamanlarda öz gücünü, texnologiyasını göstərmək üçün konseptlər hazırlayır. ARM şirkətinin də konspeti məhz öz texnologiyaları ilə təchiz edəcəyi cihazlar olacaq. Bu konsept prosessor ilə şirkət daha çox müştəri cəlb etmək və bazarı öyrənməyə çalışacaq. Lakin bütün danışdıqlarımız sadəcə iddiadır. Yəni ARM şirkəti öz prosessorunu hazırlamaya da bilər. Çünki, qarşısında Apple və Qualcomm kimi böyük maneələr dayanır.
