OPPO şirkətinə məxsus OnePlus brendi bu gün keçirdiyi təqdimat tədbiri çərçivəsində 2 yeni məhsulunu təqdim etdi. Belə ki, təqdim edilən məhsullardan biri brendin flaqman smartfonu olan OnePlus 11 modeli, digəri isə OnePlus Buds Pro 2 qulaqlıqları idi. Bəli, ötən il olduğu kimi bu il də OnePlus yalnız 1 flaqman cihaz ilə qarşımıza çıxdı. Lakin bu dəfə sələfindən fərqli olaraq yeni smartfon OnePlus 10 Pro yox, birbaşa OnePlus 11 adlandırıldı. Böyük bir ehtimalla OnePlus brendi artıq tək flaqmanlı strategiya ilə irəliləyəcək. Beləliklə, OnePlus 11 modelindən bəhs etməklə məqaləmizə başlayaq və daha sonra OnePlus Buds Pro 2 modelinə də ayrıca nəzər salaq.
OnePlus 11 seriyası biz nə vəd edir?
Smartfonun dizaynına baxdıqda OnePlus 10 Pro modelindən başlayan dizayn xəttinin davam etdirildiyini görürük. Nədir bu dizayn xətti desəniz, kamera modulundan çıxan haşiyənin smartfonun kənar çərçivələrinə doğru uzanaraq tamamlanması nəzərdə tutulur. OnePlus 11 modelində də eyni dizayn konseptindən istifadə olunub. Lakin OnePlus 10 Pro ilə müqayisədə kamera modulu düzbucaqlı yox, dairəvi dizayn edilib. Gövdənin ümumi quruluşu isə demək olar tamamilə eyni qalıb.
OnePlus 11 modelinə 6.7 düymlük LTPO 3.0 AMOLED ekran paneli quraşdırılıb. 2K təsvir ölçülü bu ekran paneli 120Hz görüntü yeniləmə tezliyinə malikdir. Sahib olduğu LTPO texnologiyası istinadən tezliyini 1Hz-ə qədər azaltması mümkündür. Sensor tezliyi 1000 Hz olduğundan xüsusilə oyunlarda toxunmaya maksimum dərəcədə sürətli cavab verə bilir. 10 bitlik HDR10+ və Dolby Vision dəstəkli ekran paneli Gorilla Glass Victus ilə zərbələrə qarşı dayanıqlıdır.
Kamera parametrləri smartfonun ən diqqət çəkən tərəfidir. Çünki, OnePlus 10 Pro modelində OnePlus 8 Pro modelindən bu yana üç dəfə ardıcıl işlədilən 48MP IMX689 sensoruna malik əsas kamera quraşdırılmışdı. Bəli, OnePlus 10 Pro modelində IMX789 sensorunun işlədildiyini deyə bilərsiniz, lakin əslində bu sensor məhz OnePlus brendi tərəfindən sifariş əsasında belə adlandırılmışdı. IMX689 sensorunu cüzi təkmilləşdirdiyini deyən OnePlus, bəlkə də diqqəti yayındırmaq üçün Sony əməkdaşlığında sensora yeni ad verdi.
Nəhayət OnePlus 11 seriyası dördüncü dəfə bu sensorla təchiz edilməyib və cihaza OIS dəstəkli yeni nəsil 50MP IMX890 sensoru quraşdırılıb. Digər iki köməkçi kamera isə 150° ultra-geniş bucaqlı 48MP IMX581 və 2 qat optik yaxınlaşdırma edə bilən OIS dəstəkli 32MP IMX789 telefoto kamerasıdır. Ultra-geniş bucaqlı kamera eyni zamanda makro kamerası kimi işlədilə bilər. Selfi kamerası isə ISOCELL S5K3P9 olub 16MP təsvir ölçüsünə malikdir. Standart olaraq “Hasselblad” imzalı cihaz kamera tərəfində bəzi əlavə yaxşılaşdırmalar da əldə edib. Ümumilikdə kamera konfiqurasiyası OPPO Find N2 modeli ilə tamamilə eynidir.
OnePlus 11 seriyası öz gücünü Snapdragon 8 Gen 2 çipsetindən alır. Cihazın bütün variantları LPDDR5X və UFS 4.0 texnologiyaları ilə gücləndirilib. 5000 mAs batareyası 100 vatt sürətli şarj dəstəkləyir. Şirkətin bildirdiyinə görə dünyanın ən böyük vibrasiya mühərriki məhz OnePlus 11 modelindədir. Bu da olduqca real hissiyata malik titrəyiş ortaya qoyur. Maqnetik “Ultra Liner 4.0” texnologiyalı səs ucaldanlara malikdir. “Stereo” olub-olmadığına dair rəsmi bir məlumat verilmir. Cihazın üst hissəsində fiziki bir səs ucaldan olmadığı üçün həqiqi “stereo” dəstəyinin dəqiqliklə olmadığını demək olar. Lakin danışıqlar üçün olan qulaq dinamiki səs ucaldan kimi də işləyə bilirsə, cihaz “stereo” effekti yaratmağı bacaracaq.
OnePlus 11 modelinin qiyməti
Smartfon 7 fevraldan etibarən qlobal bazarda satışa çıxarılacaq. Bu gün Çində satışa çıxarıldığı 12-256GB başlanğıc variantı 580$ təşkil edir. 128GB variantının olması isə gözlənilmir.
OnePlus Buds 2 Pro qulaqlığı
Yeni OnePlus Buds Pro modelinin davamı olan naqilsiz OnePlus Buds 2 Pro premium görünüşü ilə diqqət çəkib. Brendin bu qulaqlığı OnePlus 11 ilə uyğun olaraq yaşıl və qara rənglərdə təklif olunur. Həm qulaqlığın, həm də qabın üzəri quru buz hissiyatı verən örtüklə örtülüb. Qulaqlıqlar tam olaraq 48db səsi aktiv səs küy azaltma (ANC) texnologiyası ilə uda bilər. 11 mm səs drayverləri LHDC 5.0 səs kodeksini dəstəkləyir. Eyni zamanda AAC, SBC, LC3 kodeksləri ilə ən üst səviyyə təcrübə vəd edir.
Bluetooth 5.3 dəstəkləyən qulaqlıqlar oyun rejimində 54 ms gecikmə müddətinə sahib olur. Hər bir qulaqlıqda 3 fərqli mikrofon mövcud olduğundan səsin qəbul edilməsi və qarşı tərəfə ötürülməsi maksimum dərəcədə keyfiyyətli işləyir. ANC qapalı olduğu halda qab ilə birlikdə 39 saat işlətmək mümkündür. Qiyməti isə 130$ təşkil edir. OnePlus 11 modeli ilə 7 fevral tarixindən bu qulaqlıq da qlobal bazarda rəsmi olaraq əlçatan olacaq.
