Laboratoriyada hazırlanmış qan hüceyrələri, İngiltərədən olan alimlər tərəfindən ilk dəfə bir insana köçürülüb. Bristol və Cambridge alimləri tərəfindən aparılan sınağın məqsədi insan orqanizminin biotexnologiyalar hesabına hazırlanan qana qarşı necə reaksiya verdiyini təyin etmək olub. Verilən məlumata görə tədqiqat uğurlu olacağı təqdirdə çox nadir rastlanılan qan qruplarına bu üsulla qan hüceyrələrinin hazırlanması həyata keçiriləcək. Yəni, laboratoriya mühitində hazırlanmış qan iddia edilənə görə normal qan qruplarına sahib insanlar üçün işlədilməyəcək.
Aparılan araşdırmalar göstərir ki, dünyada sadəcə 10 nəfərdə belə görülən nadir qan qrupları mövcuddur
Bristol Universitetindən olan bu araşdırmanın tədqiqatçısı Ashley Toye, bəzi qan qruplarının dünya üzərində olduqca nadir olduğunu və normal insanlardan olduqca fərqləndiyini bildirib. Onun sözlərinə görə məsələn, Hindistanda indiyə qədər məlum olmayan və ilk dəfə elə məhz orda görülən müxtəlif bir qan qrupu təyin ediblər. Bombay adı verilən qan qrupunun dünyada bəlkə də 10-dan az şəxsdə olduğu düşünülür. Üstəlik bu tip fərqli qan qruplarına sahib insanlar az da olsa görülməkdədir. Laboratoriyada hazırlanmış qan hüceyrələri də məhz həmin insanlar üçün inkişaf etdirilir.
Prosesin necə işlədiyinə nəzər salsaq, hər hansısa bir şəxsdən təqribi 470 ml qan alınır. Bundan sonra isə maqnetik muncuqlar ilə kök hüceyrələri ayırd edilir. Ayırd edilən kök hüceyrələri isə laboratoriyada çoxaldılıb, sinifləndirilmiş qan hüceyrələri yaradılır. 3 həftəlik prosesin ardından 50 milyard qan hüceyrəsi fərqli bir filterləmə metodu ilə təsnif edilir. Nəticədə 15 milyard qan hüceyrəsi seçilmiş şəxslər üçün hazır vəziyyətə gəlir.
Tədqiqat çərçivəsində laboratoriyada hazırlanmış qan artıq 2 nəfərə nəql edilib. Qana əlavə olaraq tibbi məqsədlər üçün işlədilən radioaktiv bir maddə əlavə edilib ki, alimlər insan bədənində qanın hansı təsirlərə malik olduğu barədə araşdırma apara biləcəklər. Üstəlik laboratoriya mühitindən hazırlanmış qanın, normal qan hüceyrələrindən daha güclü olduğu təxmin edilir.
