Bildiyimiz kimi, ilin sonlarına doğru Xiaomi brendi yeni flaqman seriyası olan Xiaomi 14 seriyasını təqdim edəcək. Hətta bu smartfon seriyasının yeni elektromobil ilə birlikdə təqdim ediləcəyi də iddialar arasındadır. İndi isə analitiklər ilin sonunda təqdim edilməsi gözlənilən Xiaomi 14 Pro modelinin dizaynı barədə yeni görüntülər sızdırıb. Ötən günlərdə ortaya çıxan məlumatlara əsasən, yeni Xiaomi 14 seriyasından olan smartfonların əyri ekrana, daha incə ekran çəçivəsinə və daha böyük kamera sensorlarına sahib olacağı məlum idi. İndi isə yeni görüntülər smartfon barədə daha ətraflı məlumatlar ortaya çıxarır.
Beləliklə Xiaomi 14 Pro modelinin dizaynı özünəməxsus olacaq. Belə ki, Xiaomi 14 və Xiaomi 14 Pro modellərinin düz və metal çərçivəyə sahib olacağı artıq məlum olub. O cümlədən yeni flaqman 14 pro modeli sələfi kimi mərkəzində çərtik olan ekrana sahib olacaq. Bununla belə, yeni smartfon sələfindən daha kiçik 6.6 düymlük ekrana sahib olacaq. Səs idarəedici və güc düymələri smartfonun sağ tərəfində yerləşdiyi halda, sol tərəfində heç bir düymə yoxdur. Smartfonun arxasında isə 4 kamera sensorundan ibarət nəhəng kamera adası mövcuddur. Qeyd edək ki, smartfonun üst tərəfinə nəzər saldıqda, dinamiklərdən əlavə səs-küyü ləğv edən mikrofonlar ilə də qarşılaşırıq.
Ümumiyyətlə Xiaomi 14 seriyasının əvvəlcə noyabrda, daha sonra isə bu ay elan ediləcəyi iddia edilmişdi. Lakin hələ dəqiq tarix mövcud olmadığından smartfonun il sonuna qədər təqdim ediləcəyini deyə bilərik. Onu da qeyd edək ki, Xiaomi 14 Pro modeli 2K təsvir ölçülü 6.6 düymlük ekrana sahib olacaq. 120 Hz yenilənmə tezliyinə sahib bu ekran CrystalRes AMOLED olacaq. Habelə 24GB ram və 1TB yaddaş da seçimlər arasında olacaq. Xiaomi 14 Pro-nun peyk bağlantısını dəstəkləyəcəyi və MIUI 15 əsasında Android 14 əməliyyat sistemi ilə işləyəcəyi də gözlənilir.
