Tesla şirkətinin baş direktoru Elon Musk-ın söz verdiyi kimi, şirkət gələn il ev işlərində insanlara kömək edəcək insanabənzər Optimus robotlarından istifadə etməyə başlayacaq. Hətta Tesla Optimus robotlarını üçüncü şirkətlərə təchiz edə bimək üçün 2026-cı ildən kütləvi istehsala keçəcək. Lakin Tesla ilk öncə Optimus robotlarını öyrətməyi düşünür, bunun üçün şirkət 13 kq yük gəzənlərə saatda 48 dollar ödəyəcək.
Tesla-nın internet saytındakı iş təsvirinə əsasən, şirkətin Palo Altodakı bölməsində məlumatların toplanması operatorunun işi, müəyyən hərəkətləri yerinə yetirərkən hərəkət izləyən kamera və virtual reallıq eynəklərindən istifadə etməyi nəzərdə tutur. Belə ki, işçinin vəzifələri arasında gündə 7 saatdan çox gəzmək və 13,6 kiloqrama qədər yük daşımaq daxil olduğundan, bu işə namizədlərin fiziki hazırlığının yaxşı olması da tövsiyə olunur. Namizədlərin 170-180 sm boyu olmalıdır ki, motion capture kostyumu geyə bilsin və virtual reallıq mühitində uzun müddət işləyə bilsin.
Gün ərzində ayaqda durmaq, oturmaq, yerimək, əyilmək, uzanmaq, dönmək və digər fiziki hərəkətlərin həyata keçirilməsi də namizədin edəcəyi işlər siyahısında yer alır. İşçilər həmçinin, topladıqları məlumatların təhlili və hesabatların hazırlanması üçün məsuliyyət daşıyacaq. Onlar gecə-gündüz çevik iş qrafiki ilə işləyəcək, bir gün istirahət edəcək, lazım gəlsə əlavə olaraq da işləməli olacaqlar. Tesla bildirir ki, ödəniş bonusları ilə birgə saatda 25 ilə 48 dollar arasında dəyişir.
