Qualcomm şirkətinin daxili Oryon CPU nüvələri tezliklə smartfonlarda görünməyə başlayacaq. Belə ki, Bu yaxınlarda aşkar edilmiş məhsul məlumat vərəqinə görə, iki variantda təqdim olunan Snapdragon 8 Gen 4-ün yəni SM8750 və SM8750P-nin bu ilin oktyabrında təqdim ediləcəyi gözlənilir. Bundan əlavə, yeni Snapdragon 8 Gen 4 çipsetinin hansı xüsusiyyətləri ilə flaqman smartfonlara güc verəcəyi də sızdırılıb.
İlk öncə qeyd edək ki, flaqman çipset 2 versiyada SM8750 və SM8750P olmaqla bizlərə təqdim ediləcək. Buradakı “P” şəkilçisi “performans” mənasını verə bilər. Belə ki, biz əvvəlki Snapdragon çiplərindəki “AC” variantlarında oxşar addımı görmüşük. Yeni məlumat, həmçinin Qualcomm-un Snapdragon 8 Gen 4 çipsetini qabaqcıl 3nm prosesində quracağını, həm performans, həm də enerji səmərəliliyində əhəmiyyətli təkmilləşdirmələr vəd etdiyini göstərir. Qualcomm-un yüksək performanslı hesablama təklif etmək üçün nəzərdə tutulmuş ən son Oryon CPU nüvələrinə diqqət yetirilsə də, qrafik tərəfdə diqqət Adreno 8 seriyalı GPU-ya yönəldilir.
Geekbench testlərində bu Snapdragon 8 Gen 4 xüsusiyyətləri arasında 2+6 konfiqurasiyasının olduğu məlum olub. Lakin Oryon-un necə mövqe tutacağı hələlik bəlli deyil. Qeyd edək ki, noutbuklardakı Snapdragon X çiplərindəki bütün nüvələr Orion əsasında idi. Bununla belə, 8 Gen 4-ün smartfonlar üçün olduğunu nəzərə alsaq, Qualcomm istilik və güc balansını qurmalı olacaq. Maraqlısı budur ki, “Low-Power AI” (LPAI) alt sisteminin Snapdragon 8 Gen 4-də olacağını və səs, kamera eləcə də sensor monitorinqi kimi daima istifadə üçün nəzərdə tutulduğunu görmək mümkündür.
