Avropa İttifaqı Çində istehsal olunan Tesla markalı elektrik avtomobillərinə və digər Çin elektromobilləri üçün tətbiq etdiyi vergi faizlərini azaldıb. Belə ki, ən böyük vergi endirimi məhz Çində istehsal edilən Tesla markalı avtomobillərə edilib.
Xatırladaq ki, Avropa İttifaqı iyun ayında Çindən idxal edilən elektrikli avtomobillərə daha yüksək gömrük rüsumları tətbiq edəcəyini, onların ədalətsiz subsidiyalardan böyük dərəcədə faydalandığını və Avropadakı elektrikli avtomobil istehsalçılarına iqtisadi ziyan vurmaq təhlükəsi yaratdığını açıqlamışdı. İndi isə Avropa, Çində istehsal olunan Tesla markalı elektrik avtomobilləri, eləcə də digər Çin elektromobilləri üçün tətbiq etdiyi vergi faizlərini azaldıb. AB Komissiyasından verilən açıqlamada Çindən idxal edilən Tesla avtomobilləri üçün nəzərdə tutulan gömrük rüsumlarının 20,8 faizdən 9 faizə endiriləcəyi bildirilib. Qeyd edək ki, Tesla şirkəti, Avropa Birliyinə elektromobillər barəsində araşdırmada kömək edən şirkətlər arasında idi. Komissiya, şirkətin hansı subsidiyaları aldığını yoxlamaq üçün Çindəki Tesla obyektlərinə bir qrup göndərmək də daxil olmaqla bir araşdırma apardığını və digər Çin şirkətlərinə nisbətən daha az subsidiya aldığını müəyyən etməklə ona vergi güzəştləri tətbiq edib.
Bununla belə, məşhur Çin eletromobil istehsalçısı BYD-nin gömrük rüsumu 17.4%-dən sadəcə 17%-ə qədər endirilib. Habelə, Geely-nin ödədiyi rüsum 19.9%-dən 19.3%-ə qədər, SAIC-in rüsumu isə 37.6%-dən 36.3%-ə qədər endirilib. Qeyd edək ki, digər AB ilə əməkdaşlıq edən şirkətləri üçün vergi dərəcəsi 21.3% təşkil etdiyi halda, yerdə qalan bütün elektromobil istehsalçıları üçün bu göstərici 36.3% təşkil edib.
