Bildiyimiz kimi, qatlana bilən smartfon bazarı gündən-günə böyüməyə və güclənməyə davam edir. Belə ki, Çin mərkəzli texnologiya nəhəngi Honor şirkəti də bu bazarda öz payını artırmaq istəyir və bunun üçün Magic V3 modelinə arxalanır. Honor brendi yeni qatlana bilən Honor Magic V3 modelinin qlobal təqdimat tarixi ilə bağlı paylaşım edib.
Honor qatlana bilən smartfon bazarında yerini möhkəmləndirmək üçün IFA 2024 sərgisinə möhtəşəm giriş etməyə hazırlaşır. Keçən il təqdim edilən və Avropa bazarına bir qədər gec çatan Honor Magic V2-dən sonra, Honor yeni modeli Honor Magic V3-ü bu il qlobal bazara çox daha sürətli təqdim etməyi planlaşdırır. Beləliklə, Honor Magic V3 modeli qlobal bazar üçün 5 Sentyabr tarixində böyük təqdimat tədbiri təşkil etməyi planlaşdırır. Bu tədbirdə Honor həmçinin Honor MagicPad 2 12.3 və Honor MagicBook Art 14 2024 modellərini də təqdim edəcək.
Yeni qatlanan smartfonların ən çox diqqət çəkən xüsusiyyəti isə çox nazik dizayna malik olmasıdır. Belə ki, onun qalınlığı 9,2 mm, çəkisi isə cəmi 226 qramdır. Bu xüsusiyyətləri ilə smarton, daha ağır və qalın olan digər qatlana bilən telefon modellərindən daha çox, Galaxy S24 Ultra və iPhone 15 Pro Max kimi flaqman modellərə yaxın qalınlığa sahibdir. Cihaz güclü Snapdragon 8 Gen 3 çipseti ilə təchiz edilib və 5150 mAh böyük batareyaya malikdir. O, həmçinin 50MP əsas, 50MP 3.5x periskop və 40MP ultra geniş daxil olmaqla cəlbedici kamera sistemi ilə təchiz edilib. Lakin bütün bu xüsusiyyətlərə baxmayaraq, cihazın Avropa bazarındakı qiyməti maraq doğurur. Analitiklərə görə cihazın qiyməti 2000 dolları ötə bilər.
