Son dövrlərdə bir çox süni intellekt nəhəngi eləcə də OpenAI süni intellekt tərəfində yeniliklər elan edərək bütün diqqətləri öz üzərinə cəlb etmişdi. İndi isə Yandex şirkəti özünün SpeecGPT neyron şəbəkəsini təkmilləşdirir. Kommersant mənbəsi şirkətin biznes bölməsinə istinadən xəbər verir ki, Yandex yeni SpeechGPT neyron şəbəkə modeli hazırlayıb və bu məqsədlə öz komandasına mütəxəssislər də cəlb edib.
İş təsvirinə əsasən isə yeni süni intellekt modeli mətn və səsli şəkildə ötürülən əmrləri aşkarlaya, mətn və səsli bir şəkildə də cavab verə bilər. Bu süni intellekt modelinin digər bir xüsusiyyəti isə mətn və səsin kəsişdiyi yerlərdə də müxtəlif tapşırıqları həll edə bilməsi yəni multimodal süni intellekt sistemləri kateqoriyasına aid olmasıdır. “Yandex” SpeechGPT modeli ilə bağlı sualları cavabsız qoyub. Lakin şirkət bildirib ki, hazırda “Alice” köməkçisində və digər xidmətlərdə multimodallıq üzərində işləyirlər.
Axenix-də süni intellekt və qabaqcıl analitika üzrə ekspert Vladimir Kravtsevin sözlərinə görə, SpeechGPT yaxın aylarda ortaya çıxacaq və “davamlı təkmilləşdirmə prosesi” daimi olaraq davam edəcək. Onun sözlərinə görə, SpeechGPT ilk növbədə müştərilər və Yandex tərəfdaşları ilə rabitə kanalları ilə bağlı mövcud xidmətlərə daxil ediləcək, yəni mövcud sadə modellərin tədricən müasir modellərlə əvəzlənməsi olacaq. Hibrid məhsulların direktoru Svetlana Druqova hesab edir ki, Yandex-in yeni modelini Google-un Gemini və ya OpenAI ailələrinin multimodal modelləri ilə müqayisə etmək olmaz, çünki belə modellərin yaradılması üçün milyardlarla dollar tələb olunur.
