OpenAI şirkətinin ən böyük maliyyə dəstəkçisi olan Microsoft bu dəfə OpenAI şirkətinin çatbotundan istifadə edəcək. Belə ki, proqram təminatı nəhəngi Microsoft Windows 11 komanda xəttinə ChatGPT söhbət robotunu inteqrasiya edəcək. Hətta şirkətin bu planı ilə bağlı məlumatlar da bu gün ortaya çıxıb. Artıq Windows Terminal tamamilə istifadəçidən asılı olacaq yeni funksiyaya sahib olur. Daha əvvəl texnologiya nəhəngi əməliyyat sisteminə süni intellekt çatbotu əlavə etmişdi. Lakin bu çatbotun edə biləcəkləri məhdud idi. Onunla istifadəçilər sadəcə onlara maraqlı olan funksiyalarda məlumat ala bilirdi.
İndi isə Microsoft şirkətinin səyi ilə Windows 11 komanda xəttində istifadəçilər ChatGPT süni intellekt çatbotu ilə müəyyən addımlar atacaq. Tərtibatçıların fikrincə, Windows-un komanda xəttində süni intellekt alqoritmlərinin yaranması istifadəni daha da asanlaşdıracaq. Məsələn, istifadəçilər artıq müəyyən kodlar üzərindən komanda xəttində əməliyyat yerinə yetirməyə məcbur olmayacaq. İstifadəçilər süni intellekt çatbotuna konkret suallar ünvanlayacaq və cavab olaraq müvafiq əmrləri əldə edə biləcəklər.
Maraqlısı budur ki, süni intellekt əsaslı çatbot istifadəçilərə xüsusi əmr kodları verir. İlk öncə istifadəçilər çətinlik çəkdikləri mövzu barədə komanda xəttindəki çatbota müraciət edir. Məhz bu problemin həll olunması üçün müvafiq olaraq çatbot tərəfindən müəyyən əmri asanlaşdıracaq kodlar verilir. Hazırda yeni funksiya yalnız Microsoft-un Azure bulud xidmətində OpenAI API xidmətinə çıxışı olan tərtibatçılar və istifadəçilər üçün əlçatandır. Şirkətin yeni funksiyanı bütün istifadəçilər üçün nə vaxt açmağı planlaşdırdığı hələlik bəlli deyil.
