Microsoft, süni intellekt texnologiyalarının bir neçə il ərzində internet brauzerlərini və ya axtarış mühərriklərini əvəzləyəcəyini proqnozlaşdırır. Texnologiya nəhəngi, hazırda mövcud olan bəzi problemlərin aradan qaldırılması ilə birlikdə süni intellektin geniş istifadəçi kütləsi tərəfindən axtarış sistemi kimi istifadə olunacağını bildirir.
Beləliklə, Microsoft, süni intellektlə dəstəklənən alətlərin veb brauzerləri və axtarış sistemlərini əvəz edə biləcəyini iddia edib. Şirkət bildirir ki, süni intellektə əsaslanan tətbiqlər bir neçə il ərzində ənənəvi axtarış üsullarını geridə qoyacaq. “Microsoft”un süni intellekt şöbəsinin rəhbəri Mustafa Süleyman öz açıqlamalarında süni intellekt alətlərinin 3-5 il ərzində internet brauzerlərini və axtarış mühərriklərini əvəz edə biləcəyini proqnozlaşdırdığını bildirib.
Axtarış sistemləri və brauzerlərin hal-hazırda istifadəçilər üçün kifayət qədər problem yaratdığını bildirən Süleyman, gələcəkdə süni intellektlə dəstəklənən sistemlərin istifadəçilərin ehtiyaclarını daha sürətli və səmərəli şəkildə qarşılayacağını bildirib. Habelə, Süleyman, bu cür süni intellekt tətbiqlərinin internet portallarına inteqrasiya oluna biləcəyini və müxtəlif süni intellekt sistemləri ilə qarşılıqlı əlaqə quraraq istifadəçi tələblərinə cavab verə biləcəyini bildirib. Bununla belə, süni intellekt texnologiyalarının etibarlılığı ilə bağlı şühbə yaradan bəzi məqamlar da mövcuddur. Yanlış məlumatlarla bağlı problemlər, xüsusilə də, “halüsinasiyalar” bu cür tətbiqlərin düzgünlüyünü məhdudlaşdırır. Microsoft bu təhlükəsizlik və dəqiqlik problemlərini həll etmək üçün mühüm addımlar atdığını vurğulayıb.
