Microsoft, 2023-cü ilin sonundan etibarən öz virtual köməkçisi Cortana-nı Windows-da müstəqil proqram kimi dəstəkləməyəcəyini açıqlayıb. Belə ki, texnologiya nəhəngi yayımladığı bir dəstək səhifəsində bu dəyişikliyin yalnız Windows əməliyyat sistemində Cortana-ya təsir edəcəyini qeyd edib. Yəni “Cortana” varlığını Outlook mobile, Teams mobile, Microsoft Teams ekranı və Microsoft Teams otaqlarında qorumağa davam edəcək. Lakin ayrıca bir tətbiq kimi Windows daxilində Microsoft tərəfindən dəstəklənməyəcək.
Rəsmi olaraq “vaxtınıza qənaət etməyə və diqqətinizi ən vacib şeylərə yönəltməyə kömək edən şəxsi məhsuldarlıq köməkçisi” olaraq qeyd tanıdılmış Microsoft Cortana ilin sonunda həm Windows 10, həm Windows 11 üçün dəstəyini itirəcək. Cortana, əslində hazırda heç kimin həyatında bir yer tutmur. Qarşılıqlı əlaqədə sizlərə bəzi işlərdə yardım edən rəqəmsal köməkçi buraxıldığı gündən bu yana çox istifadə olunmayıb.
Windows 10-da ilk dəfə ortaya çıxan Cortana-nın Windows-dan tam olaraq nə vaxt silinmiş olacağı dəqiq bir tarixlə hələ ki, göstərilmir. Böyük bir ehtimalla il sonu “Cortana” dəstəyinin dayandırılması ChatGPT inteqrasiyalı yeni bir virtual köməkçi üçün atılmış addımın xəbərini də bizlərə gətirəcək. Çünki, Windows əməliyyat sistemi getdikcə süni intellektin ön planda oluğu bir platformaya çevrilməyə doğru irəliləyir. Bu da Cortana kimi çox “ağıllı” olmayan virtual köməkçinin əməliyyat sistemində saxlanmasına çətinlik yaradır.
Şayiələrə görə, Intel Windows 12 əməliyyat sistemini birbaşa dəstəkləyən “Meteor Lake” platforması üzərində işləyir. Burada açıq şəkildə Windows 12 dəstəyinin arxasında böyük bir ehtimalla əməliyyat sistemini texniki cəhətdən dəstəkləyən süni intellekt həllərindən söhbət gedir. Bu məsələ ilk dəfə deyil ki, gündəmə gəlir və yaxın gələcəyin “Cortana”-sı elə bəlkə də adını əvvəlcədən eşitdiyimiz “Copilot” olacaq.
