Dünyanın texnologiya nəhənglərindən biri olan Google onlayn alış-veriş sahəsində inqilabi yenilik etməyə hazırlaşır. Belə ki, texnologiya nəhəngi onlayn alış-veriş sahəsində süni intellekt texnologiyalarından istifadə etməyi planlayır. Ümumiyyətlə Google şirkəti son dövrlərdə çoxlu sayda süni intellekt layihəsi üzərində çalışır. Onlardan biri də məhz onlayn alış-veriş sahəsinə aiddir. Hətta insayderlər onlayn alış-veriş sahəsinin son dövrlərdə texnologiya nəhənginin diqqət mərkəzində olduğunu bildirir.
Bildiyimiz kimi, internet üzərindən alış-veriş edərkən aldığınız paltarlar bədəninizə tam uyğun gəlməmək riski daşıyır. Yəni onlayn alış-veriş sahəsində satıcılar əsasən öz məhsullarını modellər üzərində reklam edirlər. Bəzən isə müştərilər bədən ölçüsünə fikir vermədən məhsulu alır və məyus olur. Google şirkəti də məhz onlayn alış-veriş sahəsindəki bu riski aradan qaldırmaq istəyir. Belə ki, texnologiya nəhəngi tərəfindən hazırlanmış yeni süni intellekt sistemi bu riski aradan qaldıracaq. Əvvəlcə ABŞ-da fəaliyyətə başlayan yeni “Try On” funksiyası paltarları istədiyiniz bədəndə sizə göstərir. Bununla da, istifadəçilər məhsulu almadan onun necə olduğunu biləcəklər.
Hətta bu funksiya XXS və 4XL bədən ölçülərini süni intellekt vasitəsi ilə modelin üzərində müştərilərə göstərə biləcək. Lakin hələlik bu funksiya qadınlar üçün nəzərdə tutulub. Həmçinin yeni funksiya ilk növbədə Anthropologie, Everlane, Loft və H&M kimi brendlərin məhsullarında fəaliyyət göstərə biləcək. Lakin funksiyanın əhatə dairəsinin daha da genişləyəcəyi gözlənilir. Yeni funksiya ilə məhsulların geri qaytarılması hallarının ciddi formada azalacağı gözlənilir. Qeyd edək ki, yeni funksiyanın ABŞ-dan başqa regionlarda nə vaxt istifadəyə veriləcəyi hələlik məlum deyil.
