Ötən ilin ən məşhur yeniliyi hesab olunan ChatGPT və ya başqa sözlə süni intellekt alətləri durmadan inkişaf edir. Belə ki, artıq ChatGPT səsli əmr funksiyasına sahib olacaq. Beləliklə ChatGPT android smartfonlarda Google Assistant köməkçisini asanlıqla əvəz edə biləcək. Android Authority-dən Mishaal Rahman tərəfindən ortaya atılan iddiaya görə Android smartfon sahibləri tezliklə Google Assistant yerinə OpenAI şirkəti tərəfindən hazırlanmış ChatGPT-dən istifadə edə biləcək.
Qeyd edək ki, hazırda Android smartfonlarında ChatGPT yalnız veb versiya və ya proqram vasitəsi ilə istifadə oluna bilər. Lakin yeni iddia edilən məlumatlara əsasən ChatGPT tezliklə android istifadəçilərinin Google Assistant əvəzinə işlədə biləcəyi alternativ virtual köməkçi funksiyasını da yerinə yetirə biləcək. Yeni hazırlanan infrastruktur istifadəyə verildikdən sonra ChatGPT hazırda mövcud olan digər virtual köməkçilər kimi ekranı sürüşdürmək və ya səsli əmrdən istifadə etməklə əlçatan olacaq. Analitiklərə görə yeni infrastruktur 2024-cü ilin birinci rübündə istifadəyə veriləcək.
Ümumiyyətlə son aylarda bir çox alternativ virtual köməkçi ortaya çıxıb. Habelə Android Authority-nin məlumatına görə, ChatGPT-nin tətbiq kodlarında “com.openai.voice.assistant.AssistantActivity” adlı yeni funksiya aşkarlanıb. Adından da göründüyü kimi, bu xüsusiyyət ChatGPT üçün səsli köməkçi dəstəyinə işarə edir. Beləliklə yaxın aylarda smartfonlarınızda ChatGPT imzalı yeni virtual köməkçi ortaya çıxacaq.
