Microsoft-un qurucusu olan Bill Gates amerikalı jurnalist Kara Swisher-in podkastında süni intellekt texnologiyalarının inkişafı ilə bağlı əsas qorxularından bəhs edib. Belə ki, məşhur milyarder bu texnologiya ilə bağlı əsas qorxularını açıqlayıb.
Qeyd edək ki, Bill Gates ilk olaraq, “zərərli insanların kibercinayətkarlıq, bioterrorizm və müharibə üçün süni intellektdən istifadə edəcəyindən” narahatdır. O hesab edir ki, bu cür manipulyasiyalardan bir addım öndə olacaq və onlara qarşı dura biləcək süni intellekt yaratmaq lazımdır. İkincisi, o, insanların kütləvi şəkildə işdən çıxarılmasına və onların süni intellektlə əvəzlənməsinə səbəb ola biləcək bazardakı dəyişikliklərin sürətindən narahatdır. Bill lazımi təlim ilə tibbi süni intellekt alətlərinin dəqiq diaqnozlar qoya və satış menecerlərinin, müəllimlərin və digər mütəxəssislərin rutin tapşırıqlarını öz üzərinə götürə biləcəyinə inanır.
Eyni zamanda, Gates işçilərin işlərini itərməyəcəklərinə və əksinə onların iş həftələrinin daha az olacağına və başqa vəzifələr icra edəcəklərinə əmindir. Bununla belə, “dəyişiklik tempi” milyarderi qorxudur. Üçüncüsü isə Bill Gates süni intellekt texnologiyasına nəzarəti itirməkdən narahatdır. Bir çox tədqiqatçılar bundan əvvəl də xəbərdarlıq etmişdilər. Sahibkar etiraf edir ki, ilk iki problemin həlli üçüncüdən daha asandır. Gates özü gündəlik həyatında, məsələn, görüşləri yekunlaşdırmaq üçün süni intellektdən fəal şəkildə istifadə etdiyini bildirib. O, əvvəllər mesaj yazarkən və görüşlər planlaşdırarkən ChatGPT-dən istifadə etdiyini etiraf edib. Bununla belə, o qeyd edir ki, süni intellekt müəyyən tapşırıqların öhdəsindən o qədər də gələ bilmir.
