Daha əvvəl Bard çatbotunun Google xidmətlərinə çıxış əldə etdiyi barədə məlumat vermişdik İndi isə məlum olub ki, Bard dəstəkli Google Assistant ilk mərhələdə Samsung və Google cihazları üçün əlçatan olacaq. Xatırladaq ki, bu yaxınlarda texnologiya nəhəngi Bard dəstəkli Google Assistant proqramını elan etmişdi. Lakin bu proqramın hansı cihazlar üçün əlçatan olacağı məlum deyildi. Ümumiyyətlə Google son dövrlərdə süni intellekt tərəfində bir çox yeniliklər elan edib. Bunlardan ən önəmlisi də məhz Bard dəstəkli Google Assistant-dır.
Qeyd edək ki, artıq Google Assistant ChatGPT və Bing-ə rəqib olan məhsuldar süni intellekt proqramı Bard tərəfindən dəstəklənir. Yeni rəqəmsal köməkçi suallarınıza müvafiq cavablar vermək, şəkillər hazırlamaq, səyahət planlaşdırmaq və daha çox şey üçün internetdə, eləcə də Google hesabınızda məlumat axtara biləcək. Ancaq görünən odur ki, Bard dəstəkli Google Assistant əvvəlcə Pixel və Samsung smartfonları ilə məhdudlaşacaq. Bu isə yeni Google Assistant proqramını səbirsizliklə gözləyənlər üçün pis xəbərdir.
Yeni hesabata görə, Bard dəstəkli Google Assistant Tensor prosessorlu Pixel smartfonları və Samsung brendinin flaqman Galaxy S23 və Galaxy S24 seriyalı cihazları ilə məhdudlaşa bilər. Belə ki, bu barədə məlumat Google tətbiqinin beta versiyası olan 14.1-də tapılıb. Ortaya çıxan məlumat sübut edir ki, yeni proqram məhz Galaxy S23, Galaxy S24, Pixel 6, Pixel 7 və Pixel 8 seriyalı cihazlar üçün eksklüziv olacaq.
