Uzun müddətdir ki, rəqib olan iki nəhəng şirkət əməkdaşlıq edə bilər. Belə ki, Apple şirkəti Apple Intelligence üçün Meta şirkəti ilə əməkdaşlıq etməyi planlaşdırır. Xatırladaq ki, Apple şirkəti ötən günlərdə OpenAI ilə qurduğu əməkdaşlıq çərçivəsində Apple Intelligence sisteminə ChatGPT inteqrasiya etmişdi. Məhz eyniadlı sistem üçün texnologiya nəhəngi, indi Meta ilə əməkdaşlıq edəcək.
Məsələ ilə bağlı məlumatlara görə, Facebook-un ana şirkəti, Meta Platforms-un generativ süni intellekt modelini iPhone və digər cihazlar üçün yaxınlarda elan edilmiş AI sistemi Apple Intelligence-ə inteqrasiya etmək üçün Apple ilə danışıqlar aparır. Meta və generativ süni intellekt inkişaf etdirən digər şirkətlər Apple-ın öz iPhone-ları vasitəsilə təklif etdiyi kütləvi paylamadan yararlanmağa ümid edirlər. Generativ süni intellektə gec qatılan Apple, öz kiçik süni intellekt modellərini inkişaf etdirdi, lakin daha mürəkkəb və ya xüsusi tapşırıqlar üçün yeni əməkdaşıqlıqlar quracağını açıqlayıb. Apple Intelligence bu ayın əvvəlində şirkətin WWDC24-də təqdim edildikdə, OpenAI şirkətinin ilk tərəfdaşı olduğunu elan etmişdi.
“Biz ən yaxşısı ilə başlamaq istədik” deyən Apple proqram təminatının rəhbəri Craig Federighi OpenAI-nin “Bu gün istifadəçilərimiz üçün ən yaxşı seçimi təmsil etdiyini” də qeyd edib. O, həmçinin bildirib ki, Apple şirkəti Google-un Gemini sistemini inteqrasiya etmək niyyətindədir. Google və Meta, eləcə də AI startapları Anthropic və Perplexity də öz generativ süni intellektini Apple Intelligence-ə inteqrasiya etmək üçün Apple ilə danışıqlar aparır.
