ABŞ texnologiya nəhənglərinin balans hesabatlarını açıqlamağa başladığı bir vaxtda Çin təəccüblü şəkildə DeepSeek modelini daha aşağı qiymətlərlə təklif edib. Belə ki, ötən günlərdə verdiyimiz xəbərə görə, DeepSeek ABŞ səhm bazarına 1 trilyon dollarlıq zərər vurmuşdu. İndi isə DeepSeek şokunu dəf edə bilməmiş Alibaba öz süni intellekt modelini pulsuz təqdim edib.
Uzun müddətdir Alibaba tərəfindən hazırlanmış Qwen dil modeli Qwen2.5VL versiyası ilə veb tətbiqi olaraq istifadəyə verilmişdir. Qwen bir çox tapşırıqlar üçün optimallaşdırılıb və bunun əhəmiyyətli bir hissəsini pulsuz təklif edir. Qwen tərəfindən yerinə yetirilən tapşırıqlara mətnin yaradılması, şəkil və ya video təhlili, dilin anlaşılması, dilin öyrədilməsi, kodlaşdırma və riyazi problemlərin həlli, həmçinin ChatGPT-nin Operator modeli kimi kompüteri idarə etmək üçün tapşırıqların alınması daxildir.
Qwen2.5-Plus, Qwen2.5-14B-Instruct-1M, Qwen2.5-Turbo və Qwen2.5-72B-Instruct kimi modellər asan və ya mürəkkəb tapşırıqlar üçün seçilə bilər. Qwen komandası tərəfindən həyata keçirilən sınaq testlərində GPT-4o və Google Gemini 2.0 Flash kimi modellərlə müqayisədə video qavrama, riyaziyyat, sənəd təhlili və sual-cavab ardıcıllığında daha yaxşı performans əldə edilib. Qeyd edək ki, Qwen Chat tətbiqi, https://chat.qwenlm.ai/ və Hugging Face platformasından yüklənilə bilən Alibaba süni intellekt modeli, DeepSeek süni intellekt modeli kimi Çin dövlətinin senzura etdiyi məsələlərlə bağlı istifadəçilərə heç bir çıxış təqdim etmir.
