Google, ABŞ prezidenti Donald Trampın sərəncamından sonra ABŞ-da Google Maps-də Meksika körfəzinin adını “Amerika Körfəzi” olaraq dəyişdirəcəyini açıqlayıb. Beləlikə, Trump hakimiyyətə gəldikdən sonra atdığı ilk addımlardan biri də məhz bu olub.
Google Maps X hesabının bəyanatında deyilir: Bizim rəsmi hökumət mənbələrində yenilənmiş ad dəyişikliklərinin həyata keçirilməsi üzrə çoxdankı tətbiq üsulumuz var”. Beləliklə sözügedən dəyişiklik əmrinə əməl ediləcəyi və Meksika körfəzinin adının “Amerika Körfəzi”, Alyaskadakı Denali dağının adının isə “McKinley” olaraq dəyişdiriləcəyi açıqlanıb. Xoş xəbər odur ki, bu ad dəyişikliyi yalnız ABŞ istifadəçilərinə görünəcək. ABŞ-dan kənarda olan istifadəçilər üçün fərqli siyasət tətbiq olunacaq. Məsələn, Meksikadakı istifadəçilər hələ də xəritədə “Meksika körfəzi” adını görəcəklər. ABŞ və Meksikadan başqa ölkələrdəki istifadəçilər hər iki adı görəcəklər. Google belə hallarda ilk növbədə rəsmi yerli adları göstərmək siyasətinə malikdir.
Bu ayın əvvəlində Tramp Meksika körfəzinin adını dəyişmək niyyətində olduğunu açıqlayıb və yanvarın 20-də andiçmə mərasimində çıxışı zamanı dəyişikliyi həyata keçirəcəyini bildirib. Tramp həmçinin ABŞ-ın keçmiş prezidenti Uilyam MakKinlinin şərəfinə Denali dağının adını əvvəlki adı olan MakKinli dağına dəyişdirəcəyini bildirib. Qeyd edək ki, Alyaskada yerli amerikalılar arasında dağa verilən Denali adı 2015-ci ildə ABŞ-ın o zamankı prezidenti Barak Obamanın administrasiyası tərəfindən jest olaraq dağın rəsmi adı ilə dəyişdirilmişdi.
