Bildiyimiz kimi, Google yeni nəsil süni intellekti Gemini-ni bazara çıxardıqdan sadəcə bir neçə həftə sonra çoxsaylı problemlərlə üzləşmişdi. Belə ki, ağ dərili insanları göstərməkdən imtina edən Gemini insanlar arasında mübahisə mövzusuna çevrilmişdi. İstifadəçilər nə qədər etsələr də Gemini ağ dərili insan obrazını yaratmırdı. Məhz bu problem Google Gemini süni intellektinin irqi ayrı-seçkilik etməsi iddialarını gündəmə gətirmişdi. Nəticədə isə Google Gemini süni intellektinin vizual məzmun yaratmaq xüsusiyyətini müvəqqəti olaraq bağladı və ictimaiyyətdən üzr istədi.
Ümumiyyətlə dekabr ayında təqdim edilən Gemini Google şirkətinin indiyə qədər təqdim etdiyi ən təkmil aləti hesab olunur. Gemini süni intellekt aləti olmaqla yanaşı böyük bir dil modelidir. Bütün dil modelləri kimi, bu süni intellektin də hazırladığı məzmunlar və cavablar onun öyrədildiyi məlumatlardan asılı olaraq dəyişə bilir. Gemini süni intellektinin bu yaxınlarda göstərdiyi kimi, ədalət və doğruluq arasındakı tarazlığı təmin etmək getdikcə daha da çətinləşir. Şirkət öz süni intellekt alətini mümkün qədər etik və ədalətli etməyə çalışsa da, Gemini-nin verdiyi cavablar çox böyük problemlərə yol açır.
Qeyd edək ki, ötən günlərdə Google şirkəti tərtibatçılar və korporativ istifadəçilər üçün əsas dil modeli Gemini-nin yeni versiyası olan Gemini 1.5-i təqdim edib. İnternet nəhəngi, Gemini 1.5 ilə böyük irəliləyiş əldə etdiyini bildirirdi. Ümumiyyətlə Google sadəcə 2 ay əvvəl Gemini süni intellekt modelini təqdim etməsinə baxmayaraq artıq bu sahədə ciddi irəliləyiş əldə edib. Gemini Ultra ilə eyni səviyyədə olduğu deyilən 1.5 Pro-nu da hazırlayan Google, Gemini 1.5-in nəhəng bir kontekst pəncərəsinə sahib olduğunu, yəni çox daha böyük sorğuları emal edə və eyni anda daha çox məlumata baxa biləcəyini bildirirdi.
