2 həftə sonra, daha doğrusu 1 fevral tarixində baş tutacaq təqdimat tədbirində Galaxy S23 seriyası rəsmi olaraq qarşımıza çıxarılacaq. Lakin təqdimatdan əvvəl Galaxy S23 seriyası daxilindəki bütün cihazların texniki xüsusiyyətləri sızdırılıb və cihazlar barədə əsas detallar məlum olub. İlk növbədə qeyd etmək lazımdır ki, Avropa daxil olmaqla son sızdırılmış məlumatlar cihazların Snapdragon 8 Gen 2 çipseti ilə gələcəyini təsdiqləyir. Seriya daxilində heç bir modeldə Exynos çipsetinin mövcudluğundan bəhs edilmir. Galaxy S23, Galaxy S23+ modellərində belə Snapdragon 8 Gen 2 çipsetlərinin quraşdırıldığı bildirilir. Yəni illər sonra ölkəmizdə də Galaxy S seriyası rəsmi olaraq Qualcomm Snapdragon seriyası çipsetlə satışa çıxarılacaq deyə bilərik.
Galaxy S23 Ultra
Kamera barədə detallar Galaxy S23 Ultra modelində təkmilləşmə olduğunu təsdiqləyib. 108MP təsvir ölçülü sensor 1/1.3 düymlük F/1.7 ISOCELL HP2 200MP sensoru ilə əvəzlənib. Əsas kameranın yanında 12MP 120 dərəcə ultra-geniş bucaqlı, 10MP 3 qat optik yaxınlaşdırma dəstəkləyən telefoto və 10MP 10 qat optik yaxınlaşdırma dəstəkləyən periskopik-telefoto kameraları mövcuddur. Selfi kamerası 12MP olub 80 dərəcə genişliyində baxış bucağına malikdir.
3088x1440p təsvir ölçülü 6.8 düymlük 1-120Hz arası adaptiv tezlikli Dynamic AMOLED 2X ekran paneli Gorilla Glass Victus 2 ilə qorunacaq. 5000 mAs batareyası 45 vatt sürətli şarj dəstəkləyir. Qeyd edək ki, 10 vatt tərs və ya naqilsiz şarj dəstəyi mövcuddur. Cihaz 233 qram olub, Dolby Atmos dəstəkli “stereo” səs ucaldanlara və.s da sahibdir. Android 13 üzərinə One UI 5.1 interfeysi ilə qutudan çıxacaq. Qeyd edək ki, Galaxy S23 Ultra modelinin 128GB yaddaş variantı sızdırılmış detallar arasında yer almayıb. Yəni cihaz minimum 256GB yaddaş həcmi ilə alına bilər.
Galaxy S23+, Galaxy S23
Seriya daxilində Galaxy S23 və Galaxy S23+ modelləri barədə sızdırılan detallar isə kamera parametrlərinin hər iki cihazda eyni olduğunu göstərir. Texniki cəhətdən birə-bir eyni olan cihazlar sadəcə ölçü cəhətdən fərqlənəcəklər. Belə ki, Galaxy S23+ modeli 6.6 düymlük Dynamic AMOLED 2X ekran panelinə sahibolarkən, sadə modeldə 6.1 düymlük ekran paneli işlədilib. Hər iki ekran 2340x1080p təsvir ölçüsünə, 48-120Hz arası adaptiv görüntü yeniləmə tezliyinə və Gorilla Glass Victus 2 qoruyucu şüşəyə malikdir.
Kamera tərəfindən bizləri 1/1.56 düymlük ISOCELL GN5 50MP sensoruna malik əsas, o cümlədən 10MP 3 qat optik yaxınlaşdırma dəstəkli telefoto və 12MP 120 dərəcə ultra-geniş bucaqlı kameralar gözləyir. Selfi kameraları isə Galaxy S23 Ultra modeli ilə ən azından kağız üzərində eynidir.
Galaxy S23+ modelində 4700 mAs həcmli batareya 45 vatt şarj dəstəkləyərkən, daha kompakt Galaxy S23 modelində 3900 mAs həcmli 25 vatt dəstəkli batareya işlədilib. Hər iki cihaz 10 vatt naqilsiz şarj dəstəkləməkdədirlər. Xüsusilə, Galaxy S23 modeli 167 qram çəkisi ilə olduqca erqonomik olacaq. Lakin Galaxy S23+ modeli 195 qram ilə biraz ağırdır. Galaxy S23 Ultra modelindən fərqli olaraq bu iki cihaz 128GB yaddaşa sahib variantda da təqdim ediləcək.
