Ötən həftə Realme 10 modelinin təqdimatı baş tutmuşdu. Giriş səviyyəsi smartfon adlandıra biləcəyimiz Realme 10 modeli debüt edərkən, Realme 10 Pro seriyası modelləri qarşımıza çıxarılmadı. Böyük bir ehtimalla Çində xüsusi bir təqdimat tədbiri çərçivəsində bu modellərin tanıdılması nəzərədə tutulduğundan şirkət belə bir addım atmışdı. Lakin, nəhayət bu gün Realme 10 Pro və Realme 10 Pro+ modelləri anons edilib. Texniki cəhətdən standart orta seqment smartfonları olan bu cihazlar xüsusilə sahib olduqları dizaynları ilə diqqət çəkiblər. Realme 10 Pro modeli 1 mm qalınlığıdakı ekran çərçivəsi ilə smartfonlar arasında dünyanın ən nazik çərçivələrindən birinə, Realme 10 Pro+ modeli isə yüksək keyfiyyətli qıvrımlı ekran panelinə sahibdir.
Bu gün təqdim edilən Realme 10 Pro seriyası modelləri nə vəd edir?
İlk olaraq seriyanın ən güclü nümayəndəsi olan Realme 10 Pro+ modelindən danışmağa başlayaq. Smartfonun dizaynı ümumi olaraq baxdıqda Honor modellərini xatırladır. Qıvrımlı ekran və arxa qapaq dizaynı, o cümlədən kameraların ayrı-ayırılıqda dairəvi formada çıxıntı yaratması Honor 70 ilə xeyli bənzərlik daşıyır. Ümumilikdə dizayn cəhətdən Realme 10 Pro seriyası daxilində modelləri ayıran əsas şey isə təbii ki, şəkillərdən də gördüyünüz gövdələrin tamamilə fərqlənən dizaynıdır. Realme 10 Pro+ modeli daha premium görünüşə malik olarkən, Realme 10 Pro kəksin kənarlı olması və düz ekran paneli ilə təchiz edilməsi ilə fərqlənir.
Realme 10 Pro modeli öz gücünü Snapdragon 695 çipsetindən alır, lakin buna qarşılıq seriyanın digər güclü nümayəndəsində Dimensity 1080 çipseti işlədilir. Birbaşa Redmi Note 12 seriyası ilə rəqabət edən bu cihazlar performans cəhətdən standart orta seqment modelləri hesab edilirlər. Son olaraq qeyd edək ki, hər iki cihaz LPDDR4x opreativ yaddaş və UFS 2.2 yaddaş çiplərini özündə birləşdirir.
İndi isə cihazların ekran panelləri barədə danışmaq lazımdır. Təəssüfləndirici bir məqam da Realme 10 Pro modelinə 6.72 düymlük 120Hz tezlikli IPS LCD ekran paneli quraşdırılıb. Ekran panelinin kənar çərçivələri 1 mm də olsa, dünyanın ən keyfiyyətli IPS LCD ekran panellərindən biri də olsa istifadəçi təcrübəsində AMOLED paneli daha təsir edici məqamdır. Yenə də qeyd edək ki, bu IPS LCD ekran 16.7 milyon rəng dərinliyinə, TÜV Rheinland mavi işıq sertifikatına və.s sahibdir.
Lakin Realme 10 Pro+ modelinə olduqca yüksək keyfiyyətli 61 dərəcə kənarlardan qıvrılan 6.7 düymlük AMOLED ekran paneli quraşdırılıb. 120Hz görüntü yeniləmə tezlikli bu ekranın sensor tezliyi (toxunuşun ayırd edilməsi sürəti) 1260Hz təşkil edir. Standart smartfonlarda əksərən 240-360Hz arası sensor tezliyi olduğundan ekranın geri cavab vermə sürəti Realme 10 Pro+ modelində olduqca həssasdır. Tam olaraq 1 milyard rəng yaradan ekran FHD+ təsvir ölçüsünə malikdir. DC-Dimming (aşağı tezlikli titrəmə ilə daha az göz yorğunluğu) dərəcəsi isə 2160Hz təşkil edir. Bununla da bu cihazdakı AMOLED ekran paneli TÜV Rheinland sertifikasiyasına görə aşağı parlaqlıqda ən az “titrəməyə” sahib cihaz kimi, göz sağlamlığı cəhətdən ilk pilləyə yüksəlir.
Hər iki cihazada 108MP ISOCELL HM6 əsaslı əsas kamera və 2MP dərinlik sensoru quraşdırılıb. Realme 10 Pro+ modeli isə əlavə olaraq 8MP təsvir ölçülü 112° ultra-geniş bucaqlı kamera ilə təchiz edilib. Qeyd edək ki, Realme 10 Pro+ modelindəki dərinlik sensoru makro kamera xüsusiyyətinə də sahibdir, lakin smartfonların heç birində OIS stabilizatoru quraşdırılmayıb. Cihazların selfi kamerası isə 16MP təşkil edir. Hər iki cihaz 4K keyfiyyətdə 30FPS video qeyd dəstəyi ilə limitləndirilib.
Hər iki cihaz 5000 mAs batareyaya sahibdir. Lakin güclü model 67 Vatt sürətli şarj dəstəkləyərkən, daha zəif Realme 10 Pro modelində 33 Vatt sürətli şarj dəstəyi mövcuddur. Əlavə olaraq qeyd edək ki, hər iki cihazda həqiqi stereo səs ucaldanlar quraşdırılıb.
Android 14 üzərində Realme UI 4.0 ilə qutudan çıxan cihazların qiymətinə gəldikdə, Realme 10 Pro modelinin 8-256GB başlanğıc versiyası 225$, Realme 10 Pro+ modelinin 8-128GB başlanğıc variantı 280$ təşkil edir. Qeyd edək ki, bu qiymətlər Çin üçün nəzərdə tutulduğundan qlobal bazar qiymətləri biraz yüksək ola bilər.
