Bir müddət əvvəl Google şirkətinin YouTube premium xidmətlərinə istifadəçiləri məcbur etdiyinə dair xəbərlər paylaşmışdıq. Əgər xatırlayırsınızsa həmin xəbərlərdə YouTube tətbiqində göstərilən reklamların artırılmasından bəhs olunurdu. Lakin düşündüyünüzdən fərqli olaraq reklamların sayında 1-2 ədəd artımdan yox, 10-12 ədədə qədər artırılmış ciddi rəqəmlərdən söhbət gedirdi. Digər bir tərəfdən isə az sayda olan reklamların müddətinin artırılması da müzakirə mövzusu idi. Üstəlik müddəti artırılması planlaşdırılan reklamların 5 saniyə ərzində keçilməsinin də ləğvi və ya uzadılması test edilirdi. İndi isə YouTube platformasında 4K videoları izləmək üçün premium abunəlik tələb olunacağı bildirilir.
YouTube tətbiqində 4K videoların premium abunəliklə izlənməsi ilk növbədə YouTube TV istifadəçilərinə şamil edilə bilər
Aydın məsələdir ki, reklamların artırılması ilə bağlı edilən testlərin əsl məqsədi YouTube premium xidmətini istifadəçilərə xatırlatmaq idi. Çünki, premium abunəliyinə sahib istifadəçilərə normal olaraq reklamlar göstərilmir. Lakin reklamların sayını artırmaq istifadəçiləri premium xidmətlərə yönləndirməyə kifayət etmir. Bunun səbəbi isə brauzer istifadəçilərinin müxtəlif üsullarla reklamları bloklaması və.s ilə əlaqədardır. Beləliklə ən effektiv təsir vasitəsi videoların görüntü keyfiyyətinə müdaxilə etməkdir.
Müxtəlif YouTube istifadəçilərinin paylaşdığı məlumata görə 2160p keyfiyyətdə olan və ya 4K olaraq adlandırdığımız videoların izlənməsində premium abunəliyi tələb olunur. İlkin məlumatlara görə YouTube platforması bu xüsusiyyəti məhz YouTube TV istifadəçiləri üçün gətirməyə çalışır. Amma ekran görüntülərindən biri iPhone digəri, isə naməlum cihazdan paylaşılıb. Ehtimallarımıza görə şirkət belə bir addımı ilə ilk növbədə istifadəçilərin fikrini və reaksiyasını öyrənməyə çalışır. Görüntülərin hansı bölgədə yaşayan istifadəçilərdə müşayiət edildiyi və tam olaraq kimlərdə göründüyü naməlumdur. Nəticədə faktiki olaraq ortaya çıxan bu məlumatlar YouTube tətbiqinin 4K videolarla da bağlı hansısa planlara sahib olduğunu göstərir.
Ölkəmizdə hələ də YouTube premium aktiv olaraq istifadəyə verilməyib. Əgər platformanın test etdiyi bu yeniliklər yaxın aylarda tətbiq olunarsa ümid edirik, premium xidmətinin mövcud olmadığı ölkələrə şamil edilməyəcək.
