Hər keçən gün yeni Windows versiyası ilə bağlı şayiələr artmağa başlayır. Ümumiyyətlə Microsoft şirkətinin yeni Windows əməliyyat sistemi üzərinə işlədiyi artıq hərkəsə məlumdur. Lakin yeni Windows versiyasının nə zaman çıxacağı ilə bağlı məlumat dəqiqləşməyib. Ötən gün isə Qualcomm CEO-su bildirib ki, yeni Windows versiyası 2024-cü ilin ortalarında buraxılacaq. Şirkətin CEO-su olan Cristiano Amon, Qualcomm-un ilin ortasında gəlməsini gözlədiyi Windows-un növbəti versiyası ilə birlikdə Snapdragon X Elite CPU-nu işə salmağı hədəflədiyini söylədi.
Maraqlısı budur ki, Amon 2024-cü ilin ortalarında buraxılacaq yeni Windows versiyasından bəhs edərkən açıq şəkildə ona Windows 12 deməkdən çəkinib. Yəni, Microsoft heç də hərkəsin gözlədiyi kimi yeni əməliyyat sisteminin adını Windows 12 etməyə bilər. Lakin biz yenədə yeni Windows versiyasından Windows 12 olaraq bəhs edəcəyik. Qeyd edək ki, Microsoft şirkətinin yeni əməliyyat sistemi bir çox süni intellekt əsaslı xüsusiyyətlərə sahib ola bilər. Habelə bu əməliyyat sisteminin sadəcə məhdud sayda kompüter tərəfindən dəstəklənəcəyi də iddial olunur.
Hazırda şayiələr 2024-cü ilin ortalarında buraxılış tarixinə işarə etsə də, Windows 12 demək olar ki, hazırdır. Microsoft Windows 11 əməliyyat sistemində əldə etdiyi uğursuz nəticəni yeni əməliyyat sistemi ilə düzəltmək üçün onu maksimum tez bir zamanda hazırlayıb deyə bilərik. Xatırladaq ki, Windows 11 sistemi 2021-ci ilin oktyabr ayında elan edilmişdi. İndi isə şayiələr doğru olarsa Windows 12 iyun ayında təqdim ediləcək. Qualcomm-un baş direktoru Microsoft-un süni intellektə əsaslanan böyük Windows buraxılışını planlaşdırdığını təsdiqləsə də, bunun əslində nə olacağı bəlli deyil.
