Xiaomi şirkəti daxilində rəhbər dəyişikliyi meydana gəlib. Belə ki, bununla bağlı şirkətin hazırkı baş direktoru Lei Jun məlumat verib. Ümumiyyətlə Lei Jun, 2010-cu ilin aprelindən bu yana Xiaomi şirkətinin baş direktoru vəzifəsində çalışır və şirkətin bütün dünyada məşhurlaşmasına, dəyər qazanmasına səbəb olub. Bununla belə, o indi tamamilə yeni istiqamətə diqqət ayırmaq istədiyini və bu məqsədlə şirkətin baş direktrou vəzifəsindən istefa verdiyini açıqlayıb. Qeyd edək ki, hazırda Redmi rəhbəri olaraq uğurlara imza atan Lu Weibing artıq Xiaomi şirkətinə rəhbərlik edərək CEO vəzifəsini həyata keçirəcək.
Xiaomi şirkətinin indiyə qədər baş direktoru vəzifəsini həyata keçirən Lei Jun öz sosial şəbəkə hesabında iş yerini dəyişmək niyyətində olduğunu açıqlayıb. Habelə o, özünü tamamilə Xiaomi şirkətinin avtomobil istiqamətinə həsr etmək niyyətindədir. Lei bildirir ki, Xiaomi SU7 modeli hazırda ölkə daxilində tam miqyaslı sınaq yürüşlərindən keçirilir. Hazırda Xiaomi yeni elektromobilinin təqdimat mərasimi üçün son hazırlıqlar üzərində işləyir. Beləliklə artıq Lei Jun avtomobil tərəfində olacaq proseslərə nəzarət edəcək və şirkətin bu tərəfdə güclənməsi üçün əlindən gələni edəcək.
Xiaomi şirkətinə daha əvvəl Redmi rəhbəri olan Lu Weibing rəhbərlik edəcək və baş direktor olaraq öz vəzifəsini icra edəcək. Habelə o, bundan sonra şirkətin bütün smartfonlarının təqdimatında əsas məruzəçi olacaq ki, ilk olaraq Xiaomi 14 Ultra təqdimatında çıxış etməsi gözlənilir. Lei Jun bildirik ki, hər nə qədər o avtomobil tərəfinə keçid etsə də, smartfon tərəfi də Xiaomi üçün həmişə prioritet olaraq qalacaq. Qeyd edək ki, yeni Redmi rəhbəri də artıq Wang Teng seçilib.
