Microsoft şirkətinin Windows 12 üzərində işlədiyi artıq hərkəsə məlumdur. Hətta Windows 11 əməliyyat sistemində əldə edə bilmədiyi nəticəni yeni əməliyyat sistemi ilə əldə etmək niyyətindədir. Qeyd edək ki, Windows 11 ilk dəfə təqdim edilərkən yüzlərlə xətaya sahib idi. Məhz bu vəziyyət əməliyyat sisteminin istifadəçilərin gözündən düşməsinə səbəb olmuşdu. Microsoft istifadəçiləri Windows 11-ə keçid etməyə nə qədər məcbur etməyə çalışsa da vəziyyət dəyişmədi. İndi Tayvanlı kompüter istehsalçıları Acer və Quanta Windows 12 sisteminin 2024-cü ilin iyun ayında buraxılacağını düşünürlər.
Qeyd edək ki, tayvanın ən böyük maliyyə qəzeti olan Commercial Times, bu yaxınlarda keçirilən tibbi konfransla bağlı hesabatında Microsoft-un Windows 12 əməliyyat sisteminin gələn ilin iyun ayında buraxılacağını bildirdi. Habelə Commercial Times Quanta-nın təsisçisi və sədri Barri Lam və Acer-in sədri və baş direktoru Junsheng Chen-in şərhləri barədə də məlumat verib. Ümumiyyətlə Microsoft yeni əməliyyat sisteminin təqdim ediləcəyi dəqiq tarixi heçbir kompüter istehsalçısına bildirməyib. Quanta-nın təsisçisi və sədri Barri Lam bildirib ki, Quanta, Intel CEO-su Pat Gelsinger-in iyul ayında elan etdiyi yeni bir kompüter kateqoriyası olan “süni intellektlə işləyən kompüterlərə ilk sərmayə qoyan” olacaq.
Microsoft şirkəti Windows 11 sistemini oktyabrın 5-də, Windows 10 isə 29 iyul tarixində buraxıb. İndi isə Windows 12 əməliyyat sisteminin 2024-cü ilin iyununda təqdim ediləcəyi gözlənilir. O cümlədən yeni əməliyyat sisteminin süni intellekt əsaslı olacağı da artıq məlumdur. Belə ki, microsoft windows 11 əməliyyat sisteminə də sonuncu yenilənmə ilə copilot əlavə etmişdi. Görünən odur ki, texnologiya nəhəngi süni intellektə önəm verir.
