Ortaya çıxan yeni məlumatlara görə Windows 12 əməliyyat sistemi OpenAI-dan ChatGPT dəstəyi ala bilər. Yeni sistemin inkişaf mərhələsində olduğu deyilir. Üstəlik müxtəlif mənbələrin verdiyi məlumata görə, yeni süni intellekt imkanları Mail, Calendar, Clock və s. kimi proqramlarda görünə bilər.
Bununla belə, yaxın aylarda Windows 11 əməlliyyat sisteminin növbəti əsas buraxılışında Windows 12 sistemindəki kimi ChatGPT istifadə olunmasa belə bəzi yeni süni intellekt xüsusiyyətlərinin görünməsi mümkündür. Hal-hazırda Microsoft fonu avtomatik ləğv etmək, video zənglərdə parlaqlığı düzəltmək, səs-küyü filtrləmək və.s. üçün süni intellektdən istifadə edir.
Qeyd edək ki, AMD bütün bu imkanları təmin edəcək yeni süni intellektlə işləyən prosessorlar seriyası üzərində işləyir. Ola bilsin ki, Intel də oxşar inkişaf üzərində məşğuldur. Lakin dəqiq məlumat verilmir. Eyni zamanda, AMD süni intellekt sürətləndiricilərini qrafik kartlarına deyil, birbaşa prosessora quraşdırmağı planlaşdırır. Əslində, bu, mobil çipsetlərin analoqu olacaq.
Eyni zamanda, Windows bölməsinin rəhbəri Panos Panay bildirib ki, yeni sistem yerli kompüterlə bulud arasındakı əlaqəni gücləndirəcək. Çox güman ki, məlumatların bir hissəsi bulud hesablama sistemlərində işlənəcək. Çünki Windows əməliyyat sisteminə dəstək verəcək ChatGPT artıq Microsoft Azure gücündən istifadə edir və şirkət özü də bu yaxınlarda yeni süni intellekt texnologiyalarına 10 milyard dollar sərmayə qoyub.
Panos Panay həmçinin bildirib ki, AI istifadəçilərin Windows əməliyyat sistemində etdikləri hər şeyi dəyişəcək. Bunun necə həyata keçiriləcəyi hələ məlum deyil. Windows 12 əməliyyat sisteminin ChatGPT dəstəyi almasının nə kimi yeniliklər gətirəcəyini isə görəcəyik.
