Microsoft Windows 11 əməliyyat sisteminin uğursuzluğunun ardından Windows 12 sistemini təqdim etməyə hazırlaşır. Şirkət yeni əməliyyat sistemi üçün daha fərqli planlar hazırlayır. Hətta analitiklərə görə Microsoft Windows 12 əməliyyat sistemini abunəlik əsasında təklif edəcək. Ümumiyyətlə bu iddialar son dövrlərdə çoxalıb. Microsoft şirkətinin yeni əməliyyat sistemi ilə bağlı hər gün yeni iddialar ortaya çıxır. Təbii ki, bu iddiaların bir çoxu əsassız olsa da, bəziləri həqiqətən də maraqlıdır. Məhz abunəlik əsaslı əməliyyat sistemi də bunlardan biridir.
Əslində bu fikir qulağa heç də təəccüblü gəlmir. Çünki, hazırda bir çox şirkət, o cümlədən platforma istifadəçilərinə abunəlik əsasında müəyyən imkanlar təklif edir. Belə ki, Instagram, X kimi platformalar abunəlik qarşılığında istifadəçilərinə mavi quş, təsdiqlənmə nişanı təklif edir. Bununla yanaşı bu istifadəçilər üçün daha çox görüntülənmə və daha təkmilləşmiş dəstək xidməti də təklif edir. Görünən odur ki, Microsoft şirkəti də Windows 12 ilə abunəlik sisteminə addım atacaq. Hətta abunəlik sisteminin imkanlarından ən başlıcası süni intellekt alətləri ilə bağlı ola bilər.
Ötən aylardan etibarən Microsoft əməliyyat sistemlərinə bir neçə süni intellekt əsaslı alət əlavə etməyə başlamışdı. Bunlardan ən yenisi isə Windows 11 yenilənməsi ilə gələn Copilot funksiyasıdır. ChatGPT və ya Bing kimi istənilən suala cavab tapan bu alət, yeni əməliyyat sistemlərində daha təkmilləşmiş amma pullu formada təklif oluna bilər. Fundametal dəyişikliklərdən əlavə Windows 12 bulud dəstəyinə də sahib olacaq.
