Son dövrlərdə bütün gözlər Samsung brendinin yeni Exynos 2400 çipsetinə tərəf çevirlmişdi. Belə ki, bu çipset barədə birdən çox iddialar irəli sürülmüşdü. Nəhayət Samsung yeni Galaxy S24 seriyasında istifadə edəcəyi Exynos 2400 çipsetini elan edib və onun performansı məlum olub. Bildiyimiz kimi, cənubi koreyalı texnologiya nəhəngi bu il Galaxy S23 seriyasında Exynos çipseti istifadə etməmişdi. Yəni Galaxy S22 exynos çipsetləri ilə təchiz edilmiş son smartfon olmuşdu. İndi isə şirkət keçən il etdiyi səhvi təkrarlamaq istəmir. Beləliklə Samsung yeni Galaxy 24 seriyasında Exynos 2400 çipsetində də istifadə edəcək.
Qeyd edək ki, yeni Exynos 2400 çipsetinin performansı sələfindən daha yüksəkdir. Belə ki, 70% daha sürətli olan çipset Xclipse 940 GPU ilə təchiz olunub. Yeni çipsetin nüvə sayı barədə məlumat olmasa da, daha əvvəl ortaya çıxan iddialar çipsetin 10 nüvəli konfiqurasiyaya sahib olacağını göstərir. O cümlədən yeni çipset 4nm LPP+ əsasında istehsal olunub. Yəni bu çipset Pixel 8 və Pixel 8 pro modellərinə güc verən Tensor G3-ün 4nm LPP texnologiyasından daha az enerji sərf edir.
Snapdragon 8 Gen 3 ilə rəqabətə girəcək yeni Exynos 2400 çipseti artıq yaxın günlərdə bazara çıxacaq. Onu da qeyd edək ki, yeni Exynos çipseti Samsung Galaxy S24 və S24 Plus modellərində, Snapdragon 8 Gen 3 isə S24 Ultra modelində istifadə olunacaq. Aparılan sınaqlar nəticəsində Galaxy S24 Exynos 2400 çipseti ilə 1656 xala sahib olarkən, Snapdragon 8 Gen 2 ilə təchiz edilən Galaxy S23 üçün bu göstərici 1746 olub. Təbii ki, bu normal hesab olunur. Çünki Galaxy s24 hələ hazır olmasa belə sələfi ilə demək olar eyni performansı göstərir. Məhz bu göstəricilər bir sualı meydana gətirir, Yeni Exynos 2400 Snapdragon 8 gen 3 ilə rəqabət apara biləcəkmi?
