Bütün şirkətlər son vaxtlar öz rəqəmsal məhsullarından daha çox reklam vermək, öz xidmətlərini önə çıxarmaq və abunəlik sistemlərini istifadəyə verməyə fokuslanıb. Bu şirkətlərdən biri də Microsoft-dur ki, yeni nəsil Windows 11 əməliyyat sistemində bu sadaladığımız detallara çox diqqətlə yanaşılıb. Windows 10 əməliyyat sistemindən fərqli olaraq Windows 11 əməliyyat sistemində reklam yayımlamaq, eyni zamanda sistem xidmətlərini daha ön planda tutmaq üçün bəzi xüsusiyyətlər artırılıb. Bunlardan bəziləri hal-hazırda aktiv olsa da Microsoft şirkəti buna oxşar yeniliklər əlavə etməyi planlaşdırır.
Windows 11 əməliyyat sisteminə gələcək bezdirici yeniliklər nələrdir?
İlk olaraq start menyusuna yeni bir bölmə əlavə olunaraq həmin bölmədə reklam xarakterli veb-saytlar nümayiş etdiriləcək. Tövsiyə edilənlər bölməsi deyə əlavə edilən yenilik, rəsmi olaraq heç cür qapadıla bilməyəcək. Reklamları isə start menyusundan yalnız müəyyən kodlar hesabına CMD ilə və ya fərqli alternativlərlə qapatmaq mümkün olacaq.
Windows 11 əməliyyat sisteminin start menyusundakı yeniliklər bununla bitməyəcək. Belə ki, Microsoft hesabı yaratmayan istifadəçi davamlı olaraq bildirişlə xəbərdarlıq ediləcək. Bunun səbəbi isə yaradılan hesablar ilə istifadəçiləri OneDrive kimi Microsoft xidmətlərinə yönləndirməkdir. Hesab yaratmayan istifadəçi isə parametrlərdəki “profilinizi tamamlayın” bildirişini yenə rəsmi olaraq heç cür bağlaya bilməyəcək.
Digər bir yenilik isə Edge brauzerini tez-tez qarşımıza çıxarmağa yarayacaq. Windows 11 əməliyyat sisteminə gələn yenilikdə əməliyyat sistemi daxilində hansısa bir yerdə yazı yazıb, daha sonra onu seçdiyiniz zaman yazını internetdə axtarmaq üçün sizi Edge brauzerinə yönləndirmə ilə qarşılaşacaqsınız.
Mütəxəssislərin fikrincə Microsoft şirkəti bütün bu addımlar abunəlik üçün təməl hazırlamaq üçün atır. Sistem daxilindəki reklamlar və tövsiyə xarakterli məcburi xüsusiyyətlər ilə Microsoft da yaxın gələcəkdə abunəlik tətbiq edə bilər. Lakin potensial olaraq istifadəçiləri qeyri-leqal istifadəyə yönləndirən bu yeniliklərin effektiv nəticə verəcəyi gözlənilmir.
