2015-ci ildə təqdim edilən Windows 10, Windows əməliyyat sisteminin ən tanınmış versiyalarından biri idi. Microsoft şirkəti nə qədər çalışsa da daha yeni təqdim olunmuş Windows 11 ilə eyni uğuru əldə etməyi bacarmayıb. Lakin məcburi də olsa Windows 10 dəstəyini məcburi şəkildə sonlandırma strategiyasını yeridəcək şirkət gec də olsa məqsədinə çatacaq. Belə ki, əgər onlayn şəkildə rəsmi Windows 10 lisenziyası almaq fikriniz varsa tələsməyiniz tövsiyə edilir. Çünki, yanvar ayının sonuna kimi Microsoft rəsmi olaraq Windows 10 lisenziyası təqdim etməyi dayandıracaq. PCWorld resursu tərəfindən bildirildiyi kimi, Windows 10 Home, Professional və Workstation üçün ABŞ səhifələrində artıq belə bir mətn var:
“31 yanvar 2023-cü il Windows 10-un endirilməsinin satışa çıxarıldığı son gün olacaq. Windows 10, 14 oktyabr 2025-ci ilə qədər kompüterinizi viruslardan, casus proqramlardan və digər zərərli proqramlardan qorumağa kömək edən təhlükəsizlik yeniləmələri ilə dəstəklənməyə davam edəcək.”
Bu o deməkdir ki, 31 yanvardan sonra Microsoft öz saytında yalnız Windows 11 lisenziyalarını satacaq. Ancaq bu, Windows 10 lisenziyası almaq istəyən birinin başqa yerdən ala bilməyəcəyi demək deyil. İstifadəçilər hələ də Newegg və Amazon kimi üçüncü tərəf rəsmi pərakəndə satış mağazalarından yararlana biləcəklər. Eyni zamanda fiziki mağazalardan da Windows 10-un fiziki nüsxələri tapılacaq. Lakin Microsoft şirkətinin özü yeni nüsxələr çıxarmaqda maraqlı olmayacaq.
Windows 10 əməliyyat sistemini pul ödəmədən kompüterinizə quraşdırmaq imkanı da var, lakin bunu etsəniz kompüterinizi fərdiləşdirmək imkanınız biraz yorucu olur. Ən azından Windows əməliyyat sistemini aktivləşdirməyinizi xahiş edən nişan standart halda ekranda qalır.
Görünən budur ki, Microsoft mümkün qədər çox istifadəçinin Windows 11-dən istifadə etməsi üçün əlindən gələni edir. Windows 10 lisenziyası satışını dayandırmaq da bu məqsəd ilə görülən işlərdən biridir. Windows 11 yeniliklərinə görə yaxşı əməliyyat sistemi olsa da, bir çox istifadəçilər Windows 10-a üstünlük verməyə davam edirlər. Nəticə olaraq, Windows 10-a üstünlük verən və sisteminizi Windows 11-ə yüksəltmək istəməyən birisinizsə, bu sizin üçün o qədər də yaxşı xəbər deyil. Tezliklə hansı əməliyyat sistemindən istifadə edəcəyinizlə bağlı seçiminiz biraz da azalacaq.
