WhatsApp rəsmiləri öz-özünə mesajlaşma funksiyasını istifadəyə vermək üçün maraqlı bir yenilik üzərində işləməyə başlayıblar. Bu funksiya hal-hazırda əvvəlcədən müəyyən olunmuş iOS və Android istifadəçiləri tərəfindən beta mərhələsində əlçatandır. Xatırladaq ki, şirkət sonuncu dəfə Android cihazları üçün 2.22.24.2 beta yeniləməsini buraxdıqdan sonra bu layihə üzərində çalışmağa başlayıb.
Əslində, WhatsApp tətbiqində öz nömrənizə mesaj göndərmək texniki cəhətdən mövcuddur. Lakin əlaqə siyahısında öz nömrənizi görə biləcəyiniz xüsusi bir söhbət ekranı hələ mövcud deyil. Milyonlarla istifadəçi mesaj göndərmək, qeydlər aparmaq və müxtəlif faylları öz nömrəsinə ötürmək üçün tək iştirakçıdan ibarət qruplar yaradıb. Yeni buraxılacaq yeniləmə sayəsində “Özünüzə mesaj göndərin” seçimi mesajlaşma interfeysində görünəcək. Bəzi insayderlərin verdiyi məlumata görə, öz nömrənizlə özünüzə mesaj göndərsəniz, bu mesaj digər cihazlarınızda da görünəcək yəni sinxronizasiya problemi olmayacaq. Dahat ətraflı qeyd etsək, yeni smartfona keçib buluddan mesajlarınızı geri qaytardıqda özünüzə göndərdiyiniz fayllar itməyəcək. Bu funksiyanın bütün istifadəçilər üçün nə vaxt istifadəyə veriləcəyi isə hələlik bəlli olmasa da, qısa müddət ərzində istifadəyə veriləcəyi təxmin edilir.
Əlavə olaraq qeyd edək ki, WhatsApp 2.22.24.2 beta yeniləməsində video, GIF və ya sənəd yönləndirilərkən ekrana çıxan interfeysdə də dəyişikliklər edib. Belə ki, yönləndirmə edərkən əvvəllər sol tərəfdə görünən şəkillər indi sağ tərəfdə görünür. Bu xırda dəyişikliklərlə yanaşı, yeniləmə ilə bəzi sinxronizasiya problemləri də aradan qaldırılıb.
