Samsung smartfonları barədə məlumatları sızdıran məşhur Ice Universe sentyabrın sonunda Galaxy S23 seriyasının əvvəlki illərdən daha tez təqdim edilə biləcəyini söyləmişdi. İndi isə bir koreya mənşəli mənbələr yeni Galaxy S23 seriyası üçün ilkin sifariş posterini yayımlayıb. Cənubi Koreyanın telekommunikasiya şirkəti olan KT Corporation tərəfindən hazırlandığı idda edilən posterdə daha əvvəl sızdırılmış S23 və S23 Plus modellərinin dizaynına uyğun olan şəkillər yer alır. Paylaşılan posterdə həmçinin Galaxy S23 seriyasının ön sifarişdə olacağı tarix barədə də məlumat verilib.
Posterdə ilkin sifarişlərin 23 dekabrda başlayacağı bildirilir. Tarixin qanuni olduğunu fərz etsək deyə bilərik ki, Samsung Galaxy S23 seriyasının təqdimat tədbiri dekabrın 23-də həyata keçiriləcək. Posterdə ilkin sifarişlərin 5 yanvara qədər davam edəcəyi, yəni telefonların yanvarın 6-da satışa çıxarılacağı da bildirilir.
Yuxarıda gördüyünüz kimi, posterdə göstərilən modellər Galaxy S23 və Galaxy S23 Plus modelləridir. Dizayn baxımından kamera bölməsində dəyişikliklərin olduğu və hər kamera sensorunun ətrafında dairəvi çıxıntının olduğunu görürük. Lakin qeyd etməliyik ki, internetdə yayılan bu poster dəqiq deyil. Məlumat üçün bildirək ki, Galaxy S22 seriyası fevralın 9-da elan edilmişdi. Bundan əvvəl çıxarılmış modellər də adətən, yeni ilin fevral ayında debüt edirdi.
Əslində, Galaxy S23 seriyası da növbəti ilin ilk ayları təqdim olunmalıdır. Lakin posterdəki tarix doğrudursa Samsung şirkətinin smartfonu daha tez təqdim etməsinə bir neçə səbəb göstərilə bilər. Belə ki, bu səbəblərə şirkətin gözləniləndən az gəlir əldə etməsi və Apple, Google kimi şirkətlərin yeni modellərini təqdim etməsi, rəqiblərin Snapdragon 8 Gen 2 ilə bazarı zəbt etməsi və.s ola bilər.
