Bir neçə saat əvvəl Xiaomi şirkəti mobil fotoqrafiya sektoruna damğasını vuracaq, adətən simvolik bir smartfonunu təqdim etdi. Söhbət, başlıqdan da gördüyünüz kimi Xiaomi 12S Ultra Concept Edition modelindən və ya Xiaomi 12S Ultra “kamerafonundan” gedir. Uzun illərdir modulyar, o cümlədən aktiv obyektivə sahib smartfon modelləri görməmişdik. Şirkətlərin çoxu belə bir smartfon hazırlamağa çəkinsə də Xiaomi və Leica əməkdaşlığında hazırlanmış xüsusi Xiaomi 12S Ultra modeli ən azından bu cür smartfonların mümkün ola biləcəyini bizlərə sübut etdi.
Sadə Xiaomi 12S Ultra modelindən fərqli olaraq bu smartfonda 2 ədəd 1 düymlük 50MP IMX989 CMOS kamera sensoru mövcuddur!
İlk növbədə Xiaomi 12S Ultra Concept Edition modelinin kamera parametrlərindən danışmaq lazımdır. Çünki, bu smartfonu “Kamerafon” adlandıran əsas şey arxasına taxılan obyektivdən ibarət deyil. Sadə Xiaomi 12S Ultra modelində xatırladığınız qədərilə 1 ədəd 1 düymlük 50MP IMX989 əsas, 1 ədəd 48MP IMX586 ultra-geniş bucaqlı, 1 ədəd 48MP IMX586 5 qat optik yaxınlaşdırma edən periskopik telefoto kameraları mövcud idi.
Lakin Xiaomi 12S Ultra Concept Edition modelində aşağıdakı 48MP IMX586 periskopik telefoto kamerası yoxdur. Xiaomi şirkəti əsas kameranın gücünü fantastik dərəcədə artırmaq üçün aşağıdakı telefoto kamerasından açdığı yerə bitişdirilmiş 2 ədəd 1 düymlük 50MP IMX989 CMOS sensoru quraşdırıb.
Xİaomi 12S Ultra ilə müqayisəsinə baxdıqda ortadakı kamera sensorunun nə qədər böyük olduğunu görmək mümkündür. 48MP IMX586 periskopik telefoto kamerası isə anladığımız qədərilə sol hissəyə köçürülüb. Lakin böyük bir ehtimalla periskopik yox, sadəcə telefoto kamerasıdır. Aşağı hissədə isə əvvəl solda olan 48MP IMX586 ultra-geniş bucaqlı kamera mövcuddur. Təbii ki, 2 ədəd 1 düymlük sensor bir smartfonda təqribi olaraq 2 düymlük kamera sensorunun işlədilməsi deməkdir. Bu da F/1.4 diafraqmaya sahib Xiaomi 12S Ultra ilə müqayisədə qəbul edilən işıq miqdarını ən azı 2 dəfə artırır.
Yaxşı bəs, LEICA obyektivi hara getdi deyəcəksiniz. Belə ki, Xiaomi 12S Ultra Concept Edition modelinin kamera modulunun (kamera çıxıntısının) kənarına xüsusi bir bağlanma sistemi quraşdırılıb. Tam olaraq 1954-cü ildən bu günə qədər istehsal edilmiş LEICA M seriyası obyektivlərin hər birini bu smartfona quraşdıra bilərsiniz. Yəni bu vaxta qədər normal kameralar üçün hazırlanmış bəlkə də onlarla fərqli obyektiv bu smartfon ilə istifadə edilə bilər ki, sırf smartfon üçün xüsusi hazırlanmış obyektiv deyə bir şey yoxdur. Obyektiv seçimi tamamilə unikallaşdırılıb. Nəticədə istədiyiniz LEICA M seriyası imzalı obyektivi smartfona bağlayıb fərqli məqsədlər üçün işlədə bilərsiniz. Bu isə 2 düymlük kamera, Snapdragon 8+ Gen 1 çipsetinin yüksək keyfiyyətli emal gücü və LEICA obyektivi ilə mükəmməl nəticələr verən “kamerafon”-un ortaya çıxması deməkdir.
İddialara görə Xiaomi 12S Ultra Concept Edition sadəcə 10 ədəd olmaqla konsept kimi istehsal olunub. Ona görə də satışa çıxarılıb-çıxarılmayacağı barədə məlumat verilmir. Bəs sizcə satışa çıxarılsa bu smartfonun qiymət nə qədər olacaq?
