Son zamanlarda bir çox şirkət yeni texnologiyaya əsaslanan Virtual Reallıq cihazlarını təqdim edir. HaptX şirkəti ötən günlərdə Gloves G1 virtual reallıq əlcəklərini təqdim edib. Bu virtual əlcək vasitəsi ilə istifadəçilər virtual dünyada real toxunma hissini yaşaya biləcəklər. Bu əlcək Airpack adlanan kürək çantası ilə istifadə olunur. Belə ki, Airpack sıxılmış havanın idarəsinə və hava axınına nəzarət etməyə cavabdehdir. Hər bir əlcəkdə 135 mikrofluid ötürücü mövcuddur. Bu ötürücülər vasitəsi ilə virtual əlcək istifadəçilərə virtual dünyada real toxunma hissini yaşadır.
Gloves G1 virtual reallıq əlcəyinin texniki xüsusiyyətlərinə nəzər salsaq hər bir əlcəyin 450 qram olduğunu görərik. Həmçinin virtual əlcək istifadəçilər üçün 4 ölçüdə təklif olunur. Belə ki, bu ölçülər Small, Medium, Large və X-large olmaqla təklif olunur. Virtual əlcək Airpack adlı kürək çantasına bənzər nəzarətçinin köməyi ilə istifadə olunur. Belə ki bu çantanın çəkisi 7,7 kq ölçüləri isə 52,5 x 26,4 x 12,4 sm-dir. Airpack 802.11ac Wi-Fi texnologiyası ilə də təchiz olunub. Airpack sıxılmış hava yaradaraq ona nəzarət edir və tək şarj ilə 3 saat istifadə oluna bilir. Oyun şirkətləri Unreal Engine və Unity üçün plaginləri özündə ehtiva edən HaptX Software Development Kit vasitəsilə öz VR tətbiqlərini bu cihaz ilə inteqrasiya edə bilərlər.
HaptX Gloves G1 virtual reallıq əlcəyinin cütü 5495 dollara bazara çıxacaq. Lakin texnologiya həvəskarları ilkin sifariş ilə cihazı 4500 dollara əldə edə bilərlər. Cihazın 2023-cü ilin 3-cü rübündə satışa çıxması gözlənilir.
