Hal-hazırda suyun altında, dalğaların arasında əlaqə qurmaq üçün istifadə edilən üsul əl hərəkətləridir. Professional dalğıclar öz aralarında bu əl hərəkətləri vasitəsi ilə “yaxşısan?”, “dalışı bitir!” kimi 200-dən çox mesaj verə bilirlər. Lakin bu üsul məsafənin uzaq olduğu və yaxud görmənin çətinləşdiyi vəziyyətlərdə olduqca risklidir. Buna görə də ABŞ-ın Seattle şəhərindəki Vaşinqton Universitetinin tədqiqatçıları insanların su altında əlaqə saxlaması üçün akustik siqnallardan istifadə edən AquaApp adlı smartfon tətbiqi hazırlayıblar.
Mesajlaşmaq istifadə etdiyimiz ən asan və rahat əlaqə formalarında biridir. Gün içində mesajlarımızı isə ofis, universitet, məktəb, park, kimi yerlərdən göndəririk. Yəni başlıqda gördüyünüz suyun altında mesaj göndərə bilmək üsulu bir çoxumuzun işini asanlaşdıracaq və ya dəstək olacaq kimi görünməsə də bəzilərinin işinə çox yarayacaq. Bu cümlədə bəziləri deyə nəzərdə tutduğumuz isə təbii ki, dalğıclar və şnorkellə (suyun altında nəfəs almağa kömək edən əşya) üzməyi sevən insanlardır. Əgər üzməyi sevən və vaxtının böyük hissəsini suda keçirən birisinizsə suyun altında mesajlaşa bilmək sizin üçün AquaApp tətbiqindən istifadə edəcəksiniz.
“Akustik siqnallar suyun altında yayıla bilir”
İcadın tədqiqatçılarında olan Tuochao Chen bildirib ki, “Smartfonlar simsiz rabitə üçün Wi-Fi və Bluetooth kimi radio siqnallarına güvənir. Bu siqnallar su altında yaxşı yayılmır, lakin akustik siqnallar yayıla bilər”. Yəni tətbiqin köməkliyi ilə smartfonunuzun səs ucaldanları və mikrofonundan istifadə etməklə yaradılan “akustik siqnallar” qarşı tərəfə məlumat ötürməyə imkan verir. Nəticədə şəbəkə bağlantısı və digər siqnallar işləməsə belə təhlükəsizlik və digər məqsədlərlə əlaqə yarada bilirsiniz.
Əslində akustik siqnallar rabitə və dəniz texnologiyasında illərdir istifadə olunur. Ancaq əvvəllər bunlar xüsusi və bahalı avadanlıq tələb edirdi. Yeni icaddan sonra isə bunun üçün lazım olan tək şey su keçirməyən smartfondur. “Smartfona tətbiqi yüklədikdən sonra suyun dərinliyinə uyğun suya davamlı telefon kabrosu tapmaq kifayətdir” deyə Tuochao Chen əlavə edib.
Araşdırma qrupunun AquaApp adını verdiyi tətbiq adi smartfon və saatlarda istifadə oluna bilər. İstifadəçilər bu proqramı yüklədikdə, onların əvvəlcədən hazırlanmış 240 mesajı olur. Müxtəlif ssenarilər nəzərə alınaraq həyata keçirilən təcrübələrdə tətbiqin 30 metr məsafədən mesaj ötürə bilir. Təcili SOS mesajları kimi daha qısa mesajlarda bu məsafənin 100 metrə çata biləcəyi müəyyən edilib.
Qeyd etmək lazımdır ki, AquaApp tətbiqi hələ smartfonlar üçün tətbiq mağazalarına gəlməyib. Tədqiqatçılar əvvəlcə tətbiqi bir az daha inkişaf etdirməyi hədəfləyirlər. Bununla belə, proqram təminatı və kodlaşdırma biliyi olanlar açıq mənbəli proqramı özləri yükləyib sınaqdan keçirə bilərlər.
AquaApp tətbiqi haqqındakı fikirlərinizi şərhlərdə bizimlə bölüşə bilərsiniz.
