Ətraf mühitin çirklənməsi, xərclərin artması, təmassız texnologiyaların inkişafı kabellərin istifadəsini yavaş-yavaş minimuma endirir. Hətta ötən il Xiaomi şirkəti uzaq məsafədən simsiz şarjı mümkün edən Xiaomi Mi Air Charge adlı stansiyasını təqdim etmişdi. Bu stansiya vasitəsilə bir neçə metr daxilindəki cihazları 5 vatt gücündə şarj etmək mümkün idi. Naqilsiz şarj texnologiyaları cəhətdən yeni bir mərhələyə addım atmış Xiaomi şirkəti müxtəlif problemlərə görə Air Charge avadanlığını seriya istehsalına göndərmədi. İndi isə Cənubi Koreyalı mütəxəssislər uzaq məsafədən naqilsiz şarj texnologiyasında vacib bir irəliləyiş əldə ediblər. Qeyd edilənə görə yeni texnologiya cihazları nəinki bir neçə metr, 30 metr məsafədən naqilsiz şarj etməyə imkan verəcək.
Alimlər naqilsiz şarj üçün infraqırmızı lazer texnologiyasından yararlanıblar
Bu tip texnologiyaların ən böyük 2 mənfi cəhəti var. İlk problem effektivliyin çox aşağı olmasıdır. Naqilsiz şarj üçün məsafə nə qədər uzaq olarsa cihazların şarj sürəti bir o qədər aşağı düşür. Birinci problemi həll etmək üçün isə enerji səviyyəsini artırdıqda ikinici problem meydana çıxır. İkinci problem isə texnologiyanın insan üçün zərərli olub-olmadığı ilə bağlı yaranan suallardan ibarətdir.
Sejong Universitetinin alimləri hər iki problemin müəyyən qədər üstəsindən gəlmiş yeni texnologiya hazırlayıblar. Bu texnologiya enerjini ötürmək üçün infraqırmızı lazerdən istifadə edir. 30 metr məsafədən naqilsiz şark imkanı gətirən yenilik insan dərisinə və ya gözə zərər verməyən dalğa uzunluğuna malikdir.
Texnologiyanın işləməsi üçün isə smartfona qəbul edicinin quraşdırılması lazımdır. Adi gözlə görünməsə də şəkildə, smartfon kamerası ilə çəkilmiş görüntüdə rahatlıqla görünən infraqırmızı lazer şüualar smartfonun arxasındakı qəbul ediciyə bağlanır. Nəticədə 30 metrə qədər naqilsiz şarj etmək mümkün olur. Effektivliyə gəldikdə texnologiyanın hələ də yetərli olmadığını görürük.
1 vatt fizikada 1000 millivata bərabərdir. Hazırlanmış qurğu isə 400 millivat ilə 85 millivat arası enerji ötürə bilir. 30 metr naqilsiz şarj həqiqətən də çox böyük məsafə deməkdir. Lakin aktual istifadə ediləcək bir cihaza çevrilməsi üçün, alimlər texnologiyanı biraz da təkmilləşdirib şarj dəyərlərini artırmalıdırlar. Cənubi Koreyalı alimlər bu texnologiyanı ən azından Xiaomi Air Charge kimi 5 vatt (5000 millivatt) enerji ötürə biləcək qədər təkmilləşdirməyə çalışacaqlar. Xiaomi Air Charge modelinin ən mənfi cəhəti 5 Vatt da olsa işləmə məsafəsinin bir neçə metrdən artıq olmaması idi.
