Android 13 əsaslı One UI 5.0 təqdim edilib!

Android 13 əsaslı One UI 5.0 yenilənməsi Cənubi Koreyalı texnologiya nəhəngi Samsung tərəfindən Samsung Developer Conference (SDC) 2022 tədbirində elan olunub. Bildiyimiz kimi, Google ötən aylarda Android 13 əməliyyat sistemini təqdim etdi. Smartfon şirkətləri də yeni versiyanın öz proqram təminatına inteqrasiyası üzərində işləməyə başlayıblar və hazırda son mərhələdədirlər. Hazırda Samsung şirkətinin One UI 5.0 interfeysini nə vaxt və hansı smartfonlar üçün buraxacağı bəlli deyil. Lakin güman olunur ki, bu yenilənmə ilk olaraq Samsung galaxy S22 seriyası üçün əl çatan olacaq. Samsung qeyd edib ki, One UI 5.0 bu ayın sonunadək stabil vəziyyətə gətiriləcək.

Android 13 əsaslı One UI 5.0 hansı yeniliklərə malikdir?

Samsung yaxın dövrlərdə çıxardığı cihazlarına ən azı 3 il One UI əsaslı Android yeniləmələrini, 5 il isə təhlükəsizlik yeniləmələrini təqdim edəcəyinə söz vermişdi. Bu il şirkət bu qərarı yenidən nəzərdən keçirib. Proqram təminatı dəstəyində Apple şirkətinə birbaşa rəqib olmaq üçün qərarında dəyişikliklər edib. Belə ki, One UI 5.0 ilə birlikdə üst və orta-üst seqment modellərə ən azı 4 il One UI əsaslı Android və 5 il təhlükəsizlik yeniləməsi verilməsinin standartlaşdırılması hədəflənir.

One UI 5.0 yeni fərdiləşdirmə seçimləri və funksional xüsusiyyətlərinə malik olacaq. Android 13 əməliyyat sisteminə əsaslanan yenilənmə təkmilləşdirilmiş performans və təhlükəsizlik, həmçinin yenilənmiş animasiyalar, əməliyyat sistemindən asılı olmayaraq proqramda dil dəyişikliyi və tətbiqlər üçün fərdiləşdirilə bilən bildiriş seçimləri ilə istifadəçi təcrübəsini növbəti səviyyəyə daşımağı hədəfləyir.

Bununla belə, istifadəçilər indi One UI 5.0 əsaslı smartfonlar ilə Galaxy Watch modellərində yeni dinamik kilid ekranından yararlana biləcəklər. One UI 5.0 Smart Widget dəstəyini daha da təkmilləşdirir.