Xiaomi şirkəti rəsmi olaraq Android 13 əməliyyat sisteminə əsaslanan MIUI 14 interfeysini təqdim etdi. Xiaomi 13 seriyası ilə birlikdə debüt etmiş yeni interfeys, əslində maraqlı bir çox xüsusiyyət əldə etmişdi. Əgər yeniliklər barədə xəbərdar deyilsinizsə gəlin bunlardan bəzilərini sizlərə xatırladaq. Məsələn, MIUI 14 interfeysinin Project Blade adlı xüsusiyyəti smartfonların daha sürətli və stabil işləməsini təmin edirdi. Bu xüsusiyyətin əsası MIUI 13 ilə müqayisədə interfeys həcmini 23% daha aşağı salmaq idi. Eyni zamanda bu yenilik operativ yaddaş istifadəsini də azaltmaqdadır. Yeniliklərdən biri də istifadəçi interfeysində sistem tətbiqlərinin 8 ədədə qədər silinə bilən olmasıdır. İddialara görə ümumi işləmə performansı 88% artan, tətbiqlərin enerji sərfiyyatı isə 16% azalan yeni interfeys olduqca ideal işləməlidir. Lakin ortaya çıxan məlumatlar göstərir ki, MIUI 14 interfeysi ilə gələn yeniliklərin bir çoxu istifadəçilər üçün yararsız olacaq.
Yenilikləri çox az sayda Xiaomi smartfonu dəstəkləyəcək
İlk olaraq ən böyük problem interfeysdəki bir çox xüsusiyyətin “China Version” üçün seçilməsidir. Məsələn, tətbiq loqotipləri üçün 4 fərqli ölçü seçilməsi mümkündür. Lakin interfeysin Çin versiyasında olan sistem tətbiqlərinin müəyyən bir qismi qlobal variantında mövcud deyil. Nəticədə vizual olaraq görünən bu vacib yeniliyin qlobal bazar üçün təqdim edilməsi şübhə altındadır.
MIUI 14 interfeysi ilə gələn çatışmamazlıqlar təkcə bundan ibarət deyil. Sistem tətbiqlərinin 8 ədədi istisna olmaqla silinməsinin mümkünlüyü də müəyyən limitlər daxilindədir. Belə ki, oktyabr ayından əvvəl çıxarılmış cihazlara MIUI 14 interfeysi gəlsə belə sistem tətbiqlərinin silinməsi mümkün olmayacaq. Yəni hal-hazırda yalnız MIUI 14 interfeysinə sahib Xiaomi 13 seriyasına bu xüsusiyyətin işləməsi mümkündür.
Digər bir tərəfdən yeni foton mühərriki deyə bir yenilik var idi ki, üçüncü tərəf tətbiqlərin Android nüvəsi üzərində optimizasiyalar etməsinə icazə verib işləmə sürətini artırmağı mümkün edirdi. Bu yenilik də sadəcə Qualcomm istehsalı Snapdragon 8 Gen 1, 8+ Gen 1 və 8 Gen 2 üçün nəzərdə tutulub. Yəni Xiaomi istifadəçilərinin böyük bir qismində yenilik aktiv olmayacaq.
Yalnız Çin versiyasında olması gözlənilən MIUI 14 interfeysi xüsusiyyətlərindən biri də şəkillərdəki mətnlərin tərcüməsi xüsusiyyətidir. Bu yenilik də Snapdragon 7 və Snapdragon 8 seriyası, o cümlədən Helio G80 çipseti və üzərində olan cihazlarda işləyəcək. Yəni həm region, həm texniki səviyyədə bir limit mövcuddur.
Problemlər təkcə bununla bitməyib, Android 13 əməliyyat sistemini dəstəkləməyən cihazlara da MIUI 14 interfeysinin rəsmi olaraq gəlməyəcəyi bildirilir. Yəni Android 13 yeniləməsini almayacaq istifadəçilər üçün MIUI 14 yeniləməsi göndərilməyəcək. Nəticədə Xiaomi istifadəçiləri üçün MIUI 14 interfeysi yararsız olaraq qiymətləndirilir. MIUI 13 interfeysi üzərinə MIUI 14 yeniliyini alacaq əksər istifadəçilər interfeyslər arasındakı fərqi çox çətinliklə anlayacaqlar. Şirkətin sonradan bu mənfi hallar qarşılığında necə addım atacağı isə naməlumdur.
