Musiqinin insanın ruhunda müsbət və ya mənfi təsirlər yaratdığı hamımıza məlumdur. Bir yerə səyahət edərkən, iş görərkən, avtomobil sürərkən, yorğunluğumuzu çıxarmaq istəyərkən bir çoxumuz musiqi dinləməyi sevirik. Musiqinin canlılara təsiri olduğu kimi cansızlara da təsir etdiyi fikri yəqin ki, heç vaxt ağlınızdan keçməyib. Lakin 16 avqustda Microsoft şirkətində işləyən proqram tərtibatçısı Ramond Chen bu mövzu ilə bağlı maraqlı bir məqalə paylaşıb. Ramon Chend bildirir ki, Janet Jackson tərəfindən 1989-cu ildə yayımlanan Rhythm Nation musiqisi bəzi noutbukları çökdürür. Üstəlik qəribə bir faktor da var ki, tək musiqinin açıq olduğu noutbuk yox, yaxınlıqdakı digər noutbuklar da bu musiqi açıldığı təqdirdə çökməklə qarşılaşırlar.
Janet Jackson-un musiqisi nəyə görə noutbukları çökdürür?
Verilən məlumata görə Janet Jackson tərəfindən oxunan Rhythm Nation musiqisi bəzi HDD modellərində təbii bir rezonans effektinə səbəb olur. Musiqi açıldığı təqdirdə səs ucaldanlardan yayılan səs dalğaları, 5400 rpm ilə işləyən sərt disklərdə müəyyən daxili titrəmələr yaradır. Bu səbəbdən HDD öz fəaliyyətini dayandırır və hətta deyilənə görə texniki problemlər yaranır. Nəticədə Janet Jackson tərəfindən 1989-cu ildə yayımlanmış musiqi sərt diskin dayanması ilə noutbukları çökdürür.
Bu problem CVE-2022-38392 kodu ilə təhlükəsizlik xətası kimi qeydə alınıb. Bu xəta 2005-ci ildən etibarən bəzi noutbukların sərt disklərinin xarab olmasına səbəb olmuşdur. Noutbuk istehsalçılarının həmin vaxtlar bu problemi çətin də olsa hansısa üsulla aşkarlamağı bacardığı bildirilir. Hətta problemin yaranmaması üçün belə bir xətanın mövcudluğu təsbit edildikdən sonra lazımi tezliklərdə akitvləşən filter də kompüterlərin proqram təminatına əlavə edilib. Lakin xüsusilə köhnə noutbuklarda sistem yeniləmələrinin populyar olmaması və digər səbəblərə görə bütün cihazlar səs filterinə sahib deyillər.
Janet Jackson-un musiqisi yalnız HDD ilə işləyən noutbukları çökdürür. SSD yaddaş həllinə sahib noutbuklar bundan təsirlənmirlər. Təəssüf ki, Microsoft şirkətinin baş proqram tərtibatçısı Ramond Chen problemi yaşayan sərt disk modellərinin və noutbuk istehsalçısının (istehsalçılarının) adını məxfi saxlayır. Qeyd etməliyik ki, sərt disklərin səs təsiri ilə bənzər xətalara səbəb olduğu daha əvvəllər də sübut olunub.
