Bu gün sosial mediada və bəzi forumlarda Apple şirkətinin ən güclü iPhone 14 Pro seriyası smartfonlarında qəribə bir problemlə bağlı şikayətlər başlayıb. Belə ki, adətən AMOLED ekran panellərindəki yanıqlara bənzəyən cizgilər iPhone 14 Pro seriyası cihazlarda istifadəçiləri təşvişə salıb. Lakin eninə olan bu cizgilər normal istifadə zamanı görünmədiyi üçün, ən azından texniki bir problem olmadığı dəqiqləşib. Bütün bunlara baxmayaraq iPhone 14 Pro və iPhone 14 Pro Max modellərinin ekranında xətt yaradan xətanın dəqiq səbəbi aşkarlana bilməyib.
Ehtimallara görə iPhone 14 Pro modellərinin ekranındakı xətt problemləri iOS 16.2 yeniləməsindən qaynaqlanır
Müşahidə edilən problem iPhone 14 Pro və iPhone 14 Pro Max modellərindən başqa, digər heç bir cihazda yaşanmayıb. İlkin ehtimallara görə ekranda eninə doğru uzanan yaşıl və sarı xətlər həmişə açıq ekran funksiyasındakı bir sistem xətasından qaynaqlanır. iPhone 14 Pro seriyası smartfonunda bu tip xətt yaranan istifadəçilərə hələ ki, yalnız həmişə açıq ekranı bağlamaq və ekranın gözləmə rejimini söndürmək məsləhət görülür. Lakin bunları etsəniz belə, bəzi istifadəçilərin verdiyi məlumata görə normal istifadə zamanı da bəzən eyni halla qarşılaşa bilərsiniz.
Apple şirkəti mövzu ilə bağlı rəsmi açıqlama verməsə də servisdən dolayı olaraq verilən məlumatda əməliyyat sistemindəki xətanın problemə səbəb olduğu qeyri-rəsmi şəkildə bildirilib. Bəzi istifadəçilər isə problemin LG ilə əlaqədar olduğunu söyləyir. Ekran panellərinin kiçik bir qismi Samsung əvəzinə LG şirkətindən alınır. Ola bilsin yeniləmələr zamanı dəyişdirilən hansısa sazlama LG ekran panelinə sahib modellərdə xətaya səbəb olub. Hal-hazırda Apple şirkətinin aralıq bir yeniləmə göndərməsi gözlənilir. Əks halda iOS 16.3 çıxana qədər istifadəçilər bu problemlə cihazlarını rahat istifadə edə bilməyəcklər.
