Meta platformasının ən önəmli brendlərindən biri olan Instagram digər sosial şəbəkələrlə rəqabətdə önə çıxmağa çalışır. Buna görə də Instagram tətbiqində günü-gündən istifadəçinin zövq və istəklərinə uyğun daha çox yenilik görə bilirik. Rəqabəti formalaşdıran əsas rəqib isə TikTok-dur ki, qısa video paylaşımlarının insanlar tərəfindən maraqla izlənməsindən sonra Instagram və YouTube kimi tətbiqlərdə bənzər sahələrə doğru inkişaf olduğunu hamımız müşayiət etmişik. Mövzumuzun əsas qonağı olan Instagram isə təbii ki, bu tip addımları ilə ən ön planda olan sosial media tətbiqi olmuşdur. Yeniliklərdən məsələn, IGTV o qədər də uğurlu və məqsədəuyğun nəticə verməyib. Lakin yetəri qədər də uğurlu olan yeniliklər görmüşük. İndi isə Instagram bizə şəkilləri başa sabitləmək, 90 saniyəlik reels videosu paylaşmaq şəklində gözəl yeniləmələr gətirib.
Son yeniləmə ilə gətirilmiş yeniliklər nələrdir?
Başlayaq şəkilləri başa sabitləmək xüsusiyyətindən. Instagram sizə ən sevdiyiniz şəkli profilinizin ən üst hissəsində göstərməyə icazə verir. Bu xüsusiyyətdən yararlanmaq üçün şəkli böyük ekranda açdıqdan sonra sağ üst hissədəki parametrlər simgəsinə toxunacaqsınız. Açılan hissədə profilinə sabitlə (pinlə) düyməsinə basdıqdan sonra ən yuxarı hissədə seçdiyiniz şəkil görünəcək. Lakin nəzərə almalısınız ki, eyni vaxtda maksimum 3 şəklin sabitlənməsi mümkündür. Ona görə də insanların daha çox görməsini istədiyiniz şəkiləri diqqətlə seçməyinizi məsləhət görərdik.
Digər bir yenilik isə Reels barədədir. Reels istifadəçilərini sevindirəcək yenilik isə video müddətinin 60 saniyədən 90 saniyəyə yüksəldilməsindən ibarətdir. Eyni zamanda Reels videolarındakı səsləri redaktə edə, effektlər əlavə etmək mümkün olub. Instagram rəhbəri Adam Mosseri tərəfindən paylaşılmış videoda, bütün bu yeniliklərin istifadəçilərin işini rahatlaşdırılacağı bildirilib. İstifadəçi təcrübəsinin daha da yaxşılaşdırılması və insanların profilləri üzərində daha çox idarə imkanına sahib olması üzərində çalışıldığı qeyd edilib. Şəkilləri başa sabitləmək gələcəkdə çıxacaqların yanında sadə bir şey kimi qala bilər.
Bundan əvvəl şriftlərin tamamilə dəyişdiyi qəribə bir yeniləmə təqdim edilmişdi. Instagram Sans olaraq adlandırılmış şrift paketi özünəməxsus dizayn tərziylə fərqlənirdi. Həmin şriftlərin də əsas məqsədi, paylaşılan videolarda TikTok ilə müqayisədə müəyyən fərqin yaranmasını təmin etmək idi. Sans ilə yazı yazdıqda məzmunun məhz bu tətbiqdən olduğu məlum olurdu.
