Hələ də ABŞ embarqosu altında olan Huawei, HarmonyOS Next ilə Android-dən tamamilə imtina edəcək. Qeyd edək ki, Çin mərkəzli texnologiya nəhəngi ABŞ sanksiyaları səbəbi ilə Android sistemindən istifadə lisenziyasını da itirib. Məhz buna görə də şirkət öz əməliyyat sistemini hazırlayaraq HarmonyOS adı altında təqdim etmişdi. Lakin əməliyyat sisteminə hələ də Android APK dəstəyi mövcud idi. İndi isə şirkət yeni HarmonyOS Next versiyası ilə Android APK dəstəyini kəsərək, Android tətbiq quraşdırılmasını dayandırır.
Yeni ortaya çıxan məlumata görə, Huawei şirkətinin HarmonyOS Next əməliyyat sistemi Android proqramlarını quraşdıra və ya Android kodunu oxuya bilməyəcək. HarmonyOS üçün yeni əməkdaşlarla komandasını böyüdən çinli texnologiya nəhəngi Next versiyasında hələlik heç bir dizayn dəyişikliyi etməyəcək. Ümumiyyətlə texnologiya nəhəngi HarmonyOS əməliyyat sistemini təqdim etdiyi gündən bəri bu sistem Android Klonu olaraq təsvir edilir və şirkət də bunu daim təkzib edir. İştirak etdiyi tədbirdə bu məsələ ilə bağlı daha bir açıqlama verən Mr.Wang Chenglu iddiarı qətiyyətlə təkzib edib.
Qeyd edək ki, HarmonyOS əməliyyat sisteminin Android klonu kimi təsvir edilməsinin əsas səbəbi əməliyyat sistemin əsasını AOSP (Android Açıq Mənbə Layihəsi) üçün hazırlanmış komponentlərin təşkil etməsidir. Chenglu bildirir ki, Android əməliyyat sistemində istifadə edilən kodların hamısı Google tərəfindən hazırlanmayıb. Məhz bu səbəbdən də istifadə edilən açıq mənbə kodları Android əməliyyat sistemi ilə oxşarlığa imkan yaradır. İndi isə Huawei yeni Next versiyası ilə bütün iddialardan qurtulmağı düşünür.
