Müxtəlif ölkələrdə ən çox elektrikli avtomobil sataraq liderliyi əlində saxlayan Tesla bu dəfə elektromobil mənzillərini necə hesabladığını izah edib. Belə ki, Tesla bu barədə rəsmi X hesabında paylaşım edib. Paylaşılan videoda şirkət elektromobillərin mənzilini hesablayarkən hansı məlumatlara diqqət yetirilməli olduğunu bildirib. Ümumiyyətlə avtomobilllərin, xüsusilə də elektrikli avtomobillərin tam şarj və ya dolu çən ilə nə qədər məsafə qət edəcəyini hesablamaq qəlizdir. Çünki, bu göstərici bir çox təsirdən asılı olaraq dəyişə bilir. Gəlin görək Tesla bu göstəricini necə hesablayır?
Yəqin ki, bir çox elektromobil istifdəçisi elektrikli avtomobilinin mənzilini hesablamağa çalışıb. Hətta bəzən bu göstərici şirkətin bildirdiyi mənzildən daha az da olub. Bunun əsas səbəbi isə bir çox amillərin nəzərə alınmamasıdır. Tesla uzun müddətdir səmərəlilik və uzun mənzilli elektromobillər mövzusunda liderdir, lakin elektromobillərin enerji istehlakını hesablamağda çətinlik çəkir. Şirkət keçən il proqram yeniləməsində “çarpaz külək, qarşıdan gələn külək, rütubət və ətraf mühitin temperaturu” kimi bir çox dəyişənlərin əlavə edərək son bir neçə il ərzində elektromobil mənzillərinin hesablanmasına daha çox sərmayə qoyub.
Tesla elektromobil mənzillərini küləyin sürəti və istiqaməti, hündürlük və ya dərəcə, trafik sürəti, orta sürətlənmə, elektromobilin daxili temperaturu, rütubət və təzyiq, bulud örtüyü, ilkin batareya faizi, batareya temperaturu, avtomobilin ümumi çəkisi, sürtünmə əmsalı kimi bir çox amili nəzərə alaraq hesablayır. Hətta burada qeyd edilməyən bir çox amillər də mövcuddur. Maraqlısı budur ki, elektromobil nəhəngi bu qədər amili nəzərə alsa da, bəzən göstəricilər yenə də tam düzgün işləmir. Bunun əsas səbəbi isə sürücülərin sürüş tərzinin fərqlənməsidir.
