Google “Passkey” (keçid açarı) ilə tamamilə şifrəsiz dövrə keçir. Belə ki, şirkətin etdiyi yenilik sayəsində Chrome platformasında Android proqramlarına, həmçinin vebsaytlara şifrə olmadan daxil olmaq mümkün olacaq. Hal-hazırda birçox texnologiya nəhəngi tamamilə şifrəsiz dövrə keçid etmək istəyir. Google tərəfindən təqdim edilən bu funksiya, Android cihazları və Chrome üzərindən əməliyyatları şifrəsiz istifadə etməyə imkan verir. Mac və iOS istifadəçiləri də QR kodun köməyi ilə Google keçid açarı funksiyasından yararlana biləcəklər.
Google keçid açarı nədir?
Texnologiya nəhəngi veb sayt, tətbiq və ya cihazın kilidini açmaq üçün keçid açarı funksiyasını aktivləşdirir. Bununla da Google şifrəsiz dövrə keçid edir. Android və Google Chrome brauzerini dəstəkləyən yeni funksiyanı xüsusi şifrə və ya barmaq izi ilə istifadə etmək olar. Belə ki, Google şirkətinin yeni funksiyası əslində iki mərhələdən ibarətdir. Birincisi, istifadəçilər öz Google ID-ləri ilə qeydiyyatdan keçərək keçid açarı yaratmalı və tətbiq, veb-sayt parollarını orada saxlamalıdırlar. İkincisi, tərtibatçılar bu keçid açarından istifadə etmək üçün istifadəçilərə icazə verməlidir.
Google bloq yazısında verdiyi məlumata görə, Android istifadəçisi Mac-də Safari-dən istifadə edərkən keçid açarı ilə aktivləşdirilmiş vebsayta daxil ola bilər. Eynilə, Windows-da Chrome istifadəçisi öz iOS cihazında saxlanılmış keçid açarından istifadə edərək eyni şeyi edə bilər. Web API vasitəsilə yaradılan keçid açarları eyni veb-sayta qoşulmuş tətbiqlərlər işləyə biləcək. Texnologiya nəhəngi onuda bəyan edib ki, gələn ildən etibarən üçüncü tərəflər də bu funksiyadan istifadə edə biləcəklər. Lakin bu yenilik, ilk mərhələdə Android istifadəçiləri üçün əlçatan olacaq.
Apple isə şifrələri aradan qaldırmaq üçün təxminən 3-4 ay əvvəl Apple keçid açarını hazırlamışdı. Yeni funksiya istifadəçilərə biometrik autentifikasiya vasitəsilə öz hesablarına daxil olmaq imkanı təqdim edəcək. Lakin Apple funksiyanın nə zaman istifadəyə veriləcəyini hələ də açıqlamayıb.
