Google Chrome gələn ildən köhnə Windows əməliyyat sistemləri üçün yeniləmə dəstəyini dayandıracaq. Belə ki, 2023-cü ilin əvvəli buraxılması planlaşdırılan Chrome 110 versiyası Windows 7 və Windows 8 əməliyyat sistemləri üçün son yeniləmə olacaq. Windows 7-nin ilk dəfə 2009-cu ildə buraxılmasına və Microsoft şirkətinin 2020-ci ildə bu əməliyyat sisteminə dəstəyini rəsmi olaraq dayandırmasına baxmayaraq, hələ də milyonlarla istifadəçi bu əməliyyat sistemindən istifadə edir. Bu rəqəmin ən az 100 milyon olduğu təxmin edilir. Beləliklə, gələn ildən milyonlarla istifadəçi tezliklə həm dəstəklənməyən əməliyyat sistemi, həm də rəsmi olaraq dəstəklənməyən veb brauzerə sahib olacaq. Belə halda isə milyonlarla istifadəçinin əhəmiyyətli dərəcədə təhlükəsizlik riski yarana bilər.
Google şirkətinin verdiyi məlumata görə Chrome 110 yeniləməsindən sonra brauzer işləməyə davam edəcək. Lakin brauzer gələcəkdə köhnə Windows əməliyyat sistemləri üçün heç bir yeniləmə qəbul etməyəcək. Əlavə olaraq qeyd etmək lazımdır ki, Windows 8 əməliyyat sistemi 2012-ci ildə buraxılsa da Windows 7 əməliyyat sisteminin istifadəçilərinin əksəriyyəti bu əməliyyat sisteminə keçid etməmişdi. Nəticədə Windows 7 ilə birlikdə eyni hal Windows 8 üçün də şamil olunur. Lakin 2020-ci ildə təqdim olunan Windows 10 əməliyyat sistemi üçün eyni sözləri demək mümkün olmayacaq.
Beləliklə, əgər siz hələ də bu köhnə əməliyyat sistemlərinin birindən istifadə edirsinizsə, mümkün qədər tez Windows 10 və ya Windows 11 əməliyyat sistemlərinə keçməyiniz tövsiyə olunur. Yeni əməliyyat sistemlərindən istifadə edərək siz, əməliyyat sisteminiz üçün təhlükəsizlik yeniləmələri ala, ən son Chrome xüsusiyyətlərindən yararlana biləcəksiniz.
