Ötən ay Apple şirkətinin yeni təqdim etdiyi smartfon və ağıllı saat modelləri maraqlı bir yeniliklə diqqət çəkirdi. Yeni iPhone 14 seriyası modelləri və Apple Watch modelləri ani hərəkət dəyişikliyini, “G” qüvvəsini hesablaya bilmə bacarığı əldə etmişdi. Bu yenilik bacarıq isə qəzaların avtomatik təyin olunmasında istifadə edilirdi. Xüsusi akselerometr və 3 oxlu giroskop hesabına 256G qüvvəsinə qədər zərbə təyini edilə bilirdi. Qəza təyin edildikdən sonra isə 10 saniyə ərzində fövqəladə zəngi ləğv etməsəniz smartfon avtomatik təhlükəsizlik zəngi həyata keçirirdi. Funksiyanın necə işlədiyinə bu məqləmizdən videolu formada da baxa bilərsiniz. Lakin yenilik o qədər də mükəmməl işləmir. Çünki, yeni nəsil iPhone və Apple Watch istifadəçilərinin cihazları yanlışlıqla qəza xəbərdarlığı sistemini aktivləşdirir.
iPhone 14 seriyası və ya Apple Watch 8 seriyası ilə attraksionlara minən istifadəçilər qəribə halla qarşılaşıb
Yüksək sürətli əyləncə qatarlarında ani sürət və G qüvvəsi dəyişimi, yüksək səs səbəbi ilə Apple məhsulları qəza olduğunu düşünüb qəza xəbərdarlığı sistemini işə salır. Baş verən qəzaları çox mükəmməl formada aşkarlayan sistem təhlükəsizlik cəhətdən vacib iş görür. Lakin birbaşa fövqəladə zənglə bağlı olan yeniliyin operatorları boş-boşuna məşğul etməsi də qəbul ediləcək bir hal deyil.
Yuxarıdakı tvitdə sürət qatarındakı istifadəçinin iPhone 14 Pro smartfonundan 911-ə edilən zəngi dinləyə bilərsiniz. Yaşanmış olan bu fakt eyni zamanda smartfonun qarşı tərəfə necə məlumat ötürdüyünü də ortaya qoyub. Belə ki, mövcud yerin koordinatlarını, yaşanmış halın avtomobil qəzası olaraq təyin edildiyini, sahibinin smartfona cavab vermədiyini və anladığımız qədərilə smartfonun qəza təyin edildikdən sonra hərəkət etməsinə görə axtarış radiusu məlumatlarını ötürdüyü görülüb. Mesaj isə xəbərdarlıq zəngi ərzində 7 dəfə təkrarlanıb.
Ölkəmizdə bu funksiya normal olaraq aktiv olmasa da bu cihazlara sahib olan şəxslərə belə xətalardan yayınmaq üçün diqqətli olmaları məsləhət görülür. Apple cihazları uçuş rejimində olduqda qəza xəbərdarlığı sistemi deaktiv edilir. Ən azından bu kiçik faktora diqqət etməklə belə vəziyyətlərin yayınmaq mümkündür.
