Bir zamanların ən çox istifadə olunan Office proqram paketlərindən olan Office 2016 və Office 2019 üçün yolun sonu gəlir. Belə ki, Microsoft öz rəsmi saytında Office 2016 və Office 2019 proqram paketləri üçün göstərdiyi dəstəyin sona yaxınlaşdığını elan edib. Şirkət həmçinin office brendinin daha yeni versiyalarını xatırladaraq onların nə qədər müddət dəstəklənəcəyini açıqlayıb.
Beləliklə, Microsft istifadəçiləri üçün MS Office proqram paketinin köhnə versiyalarının ömrü 14 oktyabr 2025-ci ildə başa çatacaq. Məhz qeyd edilən tarixdən sonra Office proqram paketinin 2016 və 2019 veriyaları dəstəklənməyəcək və heç bir yenilənmə əldə etməyəcək. Maraqlısı budur ki, 13 Oktyabr 2026-cı ildə şirkət hazırda geniş istifadə olunan Office 2021 proqram paketi üçün də dəstəyini kəsəcək. Buna əsas səbəb kimi isə şirkətin bu ildən etibarən Office 2024 proqram paketini təqdim edəcəyi göstərilir. Hətta bu ay yeni Office 2024 paketinin beta versiyası əlçatan olacaq.
Qeyd edək ki, Windows 10 və 11 əsaslı kompüterlərdə Office 2024 və Office 2024 LTSC paketləri beş illik dəstək alacaq. Şirkətdən verilən məlumata görə, abunə əsaslı Microsoft 365 E3-ə daxil olan yeni funksiyaların yalnız bəziləri əlçatan olacaq. Bundan əlavə, 2025-ci ilin ikinci yarısında Exchange Server platforması da yeni versiya alacaq. Microsoft bütün istifadəçilərə müvafiq yeniləməni alacaq Exchange Server 19-un cari quruluşuna təkmilləşdirməyi tövsiyə edir.
